പള്ളുരുത്തി: ലോറിയില്‍ നിന്ന് മെറ്റല്‍ റോഡിലേക്ക് വീണതിനെ തുടര്‍ന്ന് നിരവധി ഇരുചക്രവാഹനങ്ങള്‍ അകടത്തില്‍പ്പെട്ടു. തോപ്പുംപടി ബി.ഒ.ടി പാലം കുണ്ടന്നൂര്‍ റോഡില്‍ ഇന്ന് പുലര്‍ച്ചയോടെയായിരുന്നു സംഭവം.
റോഡില്‍ വീണ മെറ്റലില്‍ തെന്നി റോഡിലേക്ക് വീണ് നിരവധി ബൈക്ക് യാത്രികര്‍ക്കാണ് പരുക്കേറ്റത്. കുണ്ടന്നൂര്‍ ഭാഗത്ത് നിന്നും തോപ്പുംപടി ഭാഗത്തേക്ക് വന്ന വാഹനങ്ങളാണ് അപകടത്തില്‍ പെട്ടത്. സംഭവം അറിഞ്ഞ് തുറമുഖ ഫയര്‍ സേഫ്ടി ഓഫീസര്‍ കെ.സുബ്രഹ്മണ്യം, ഹാര്‍ബര്‍ പൊലിസ് എ.എസ്.ഐ അജയകുമാര്‍ എന്നിവരുടെ നേത്യത്വത്തില്‍ എത്തിയ സംഘം മണിക്കൂറുകള്‍ എടുത്താണ് റോഡിലെ മെറ്റലുകള്‍ നീക്കം ചെയ്ത്.
എട്ട് മണിയോടെ മെറ്റലുകള്‍ പൂര്‍ണ്ണമായും നീക്കം ചെയ്ത് റോഡ് ഗതാഗതയോഗ്യമാക്കി.അപകടം ഉണ്ടാക്കിയ ലോറിയെ കുറിച്ച് അധികൃതര്‍ക്ക് ഒരു വിവരവും ലഭിച്ചിട്ടില്ല.
അപകടത്തില്‍പ്പെട്ട യാത്രികരുടെ പരിക്കുകള്‍ ഗുരുതരമല്ലാത്തതിനാല്‍ ആരെയും ആശുപത്രിയില്‍ പ്രവേശിപ്പിച്ചില്ലെന്ന് ഐലന്റ് എസ്.ഐ പറഞ്ഞു.