കുന്ദമംഗലം: വിരുന്നെത്തിയ അതിഥിയുടെ ഉടമയെ തേടി ഗോപാലന്‍ നായര്‍. കുന്ദമംഗലം സി.ഡബ്ല്യു.ആര്‍.ഡി.എമ്മിന് സമീപം താമസിക്കുന്ന കുഴിമ്പാട്ടില്‍ കെ.സി ഗോപാലന്‍ നായരുടെ വീട്ടിലാണ് ബുധനാഴ്ച പോമറേനിയന്‍ ഇനത്തില്‍പെട്ട വളര്‍ത്തുനായ വിരുന്നെത്തിയത്.
ബുധനാഴ്ച വൈകിട്ട് ഇദ്ദേഹത്തിന്റെ വീടിന്റെ പരിസരത്ത് അലഞ്ഞുതിരിഞ്ഞു നടന്ന നായയെ ഗോപാലന്‍ നായര്‍ വീട്ടില്‍ കൊണ്ടുപോയി ഭക്ഷണം കൊടുത്ത് സൂക്ഷിച്ചിരിക്കുകയാണ്. സമീപ വീടുകളിലൊക്കെ നായയെയും കൊണ്ടു നടന്നെങ്കിലും ഉടമയെ കണ്ടെത്താന്‍ സാധിച്ചില്ല. ഇന്നലെ മൃഗാശുപത്രിയില്‍ കൊണ്ടുപോയി ഡോക്ടറെ കൊണ്ട് പരിശോധ നടത്തിയെങ്കിലും അസുഖമൊന്നും ഇല്ലെന്ന് കണ്ടെത്തി. പ്രതിരോധ കുത്തിവെപ്പ് നടത്തി.
പത്തുവര്‍ഷം മുന്‍പ് ഹെഡ് പോസ്റ്റ് ഓഫിസില്‍നിന്ന് പോസ്റ്റ് മാസ്റ്ററായി റിട്ടയര്‍ ചെയ്ത ഗോപാലന്‍ നായര്‍ 15 വര്‍ഷം മുന്‍പ് താന്‍ ഓമനിച്ച് വളര്‍ത്തിയ നായ ലോറിയിടിച്ച് ചത്തതിന്റെ ഓര്‍മയിലാണ്. നായയെ പുറത്തിറക്കി വിട്ടാല്‍ സദാസമയം വാഹനം കടന്നുപോകുന്ന റോഡില്‍ വെച്ച് വാഹനം ഇടിച്ച് നായക്ക് പരിക്കേല്‍ക്കുമോ എന്ന ആശങ്കയിലാണ് ഗോപാലന്‍ നായര്‍.
നായയെ വീടിന്റെ മുകളിലെ മുറിയില്‍ സുരക്ഷിതമായി തല്‍ക്കാലം പാര്‍പ്പിച്ചിരിക്കുകയാണ് ഇദ്ദേഹം. യഥാര്‍ഥ ഉടമ എത്തുമെന്ന പ്രതീക്ഷയിലാണ് ഗോപാലന്‍ നായര്‍. ഫോണ്‍ നമ്പര്‍: 9400503188.