ലണ്ടന്‍: വിക്കിലീക്‌സ് സ്ഥാപകന്‍ ജൂലിയന്‍ അസാന്‍ജെ ലണ്ടനില്‍ അറസ്റ്റില്‍. ബ്രിട്ടണ്‍ പൊലിസാണ് അസാന്‍ജെയെ അറസ്റ്റ് ചെയ്തത്. ലണ്ടനിലെ ഇക്വഡോര്‍ എംബസിയില്‍ കഴിഞ്ഞ ഏഴു വര്‍ഷമായി താമസിക്കുകയായിരുന്നു അസാന്‍ജെ.

ഇക്വഡോര്‍ രാഷ്ട്രീയ അഭയം പിന്‍വലിച്ചതിനെ തുടര്‍ന്ന് ലണ്ടന്‍ മെട്രോപൊലിറ്റന്‍ പൊലിസ് എംബസിയില്‍ കടന്ന അസാന്‍ജെയെ അറസ്റ്റ് ചെയ്യുകയായിരുന്നു. മധ്യലണ്ടനിലെ പൊലിസ് സ്റ്റേഷനിലേക്കാണ് അസാന്‍ജിനെ കൊണ്ടുപോയത്. പിന്നീട് കോടതിയില്‍ ഹാജരാക്കും.

2010ല്‍ യു.എസ് സര്‍ക്കാരിന്റെ നയതന്ത്ര രേഖകള്‍ ചോര്‍ത്തി വിക്കിലീക്‌സില്‍ പ്രസിദ്ധീകരിച്ചതിന് അന്വേഷണം നേരിടുന്ന അസാന്‍ജ് 2012 മുതല്‍ ലണ്ടനിലെ ഇക്വഡോര്‍ എംബസിയില്‍ അഭയം തേടിയിരിക്കുകയാണ്.

ആറു വര്‍ഷത്തിലേറെയായി ഇക്വഡോര്‍ എംബസിയില്‍ അഭയം പ്രാപിച്ചിട്ടുള്ള അസാന്‍ജിനെ പുറത്താക്കിയേക്കുമെന്നു പ്രസിഡന്റ് ലെനിന്‍ മൊറോനോ സൂചിപ്പിച്ചിരുന്നു. ബ്രിട്ടനെതിരേ ചില വിവാദപരാമര്‍ശങ്ങള്‍ നടത്തിയത് ഇക്വഡോറിനെ ചൊടിപ്പിച്ചിരുന്നു.