ജയ്പൂര്‍: സച്ചിന്‍ പൈലറ്റിനൊപ്പമുള്ള വിമത എം.എല്‍.എമാരെ ചോദ്യം ചെയ്യാന്‍ രാജസ്ഥാന്‍ പൊലിസ് കഴിഞ്ഞ ദിവസവും ഹരിയാനയിലെ റിസോര്‍ട്ടിനു മുന്‍പിലെത്തിയതായി വിവരം. എന്നാല്‍, ഇവരെ റിസോര്‍ട്ടിലേക്കു കടത്തിവിട്ടില്ല. തുടര്‍ന്ന് അരമണിക്കൂറോളം ഗേറ്റിനു പുറത്തുനിന്ന പൊലിസുകാര്‍ മടങ്ങുകയായിരുന്നു.

കഴിഞ്ഞ ദിവസവും രാജസ്ഥാന്‍ പൊലിസിന്റെ അന്വേഷണ സംഘം രണ്ടു വിമത എം.എല്‍.എമാരെ ചോദ്യം ചെയ്യുന്നതിനായി മനേസറിലെ റിസോര്‍ട്ടിലെത്തിയിരുന്നു. അന്ന് അവരെ ഹരിയാന പൊലിസ് തടയുകയും പിന്നീട് റിസോര്‍ട്ടിലേക്കു കടത്തിവിടുകയും ചെയ്‌തെങ്കിലും ഉദ്യോഗസ്ഥര്‍ക്ക് എം.എല്‍.എമാരെ കാണാനായിരുന്നില്ല. സര്‍ക്കാരിനെ മറിച്ചിടാന്‍ ശ്രമിച്ചെന്ന കേസില്‍ പ്രതിചേര്‍ക്കപ്പെട്ട ഭന്‍വര്‍ലാല്‍ ശര്‍മ, വിശ്വേന്ദ്ര സിങ് എന്നീ എം.എല്‍.എമാരെ തേടിയാണ് പൊലിസെത്തിയിരുന്നത്.

പൈലറ്റിന്റെ ക്യാംപില്‍ 19 കോണ്‍ഗ്രസ് എം.എല്‍.എമാരും രണ്ടു സ്വതന്ത്ര എം.എല്‍.എമാരും ഉണ്ടെന്നാണ് കണക്കാക്കപ്പെടുന്നത്. അതേസമയം, കേസില്‍ കേന്ദ്രമന്ത്രി ഗജേന്ദ്രസിങ് ഷെഖാവതിന് രാജസ്ഥാന്‍ പൊലിസ് നോട്ടിസയച്ചിട്ടുണ്ട്. ഇതിനു പിന്നാലെ, ആദ്യം ശബ്ദത്തിന്റെ ആധികാരികത ഉറപ്പുവരുത്തൂവെന്ന് പൊലിസിനോട് ആവശ്യപ്പെട്ടും തനിക്ക് പങ്കില്ലെന്ന് ആവര്‍ത്തിച്ചും അദ്ദേഹം രംഗത്തെത്തിയിട്ടുമുണ്ട്. 

കോണ്‍ഗ്രസ് നേതാക്കള്‍ അടിസ്ഥാനരഹിതമായ ആരോപണങ്ങള്‍ ഉന്നയിക്കുന്നെന്നും അന്വേഷണം വേണമെന്നുമാവശ്യപ്പെട്ട് ഡി.ജി.പിക്കു ബി.ജെ.പി സംസ്ഥാന നേതൃത്വവും പരാതി നല്‍കിയിട്ടുണ്ട്.