കണ്ണൂര്‍: പാലത്തായി പീഡനക്കേസില്‍ തുടരന്വേഷണം വേണമെന്ന ആവശ്യം ശക്തമായി. ക്രൈംബ്രാഞ്ച് ഐ.ജിയുടെ നേതൃത്വത്തിലുള്ള പ്രത്യേക അന്വേഷണസംഘം പോക്‌സോ ആക്ട് ഒഴിവാക്കി കുറ്റപത്രം സമര്‍പ്പിച്ചതിനെ തുടര്‍ന്നു പ്രതിയായ അധ്യാപകനും ബി.ജെ.പി നേതാവുമായ കടവത്തൂരിലെ കുനിയില്‍ പത്മരാജനു ജാമ്യം ലഭിക്കുകയും ചെയ്ത സംഭവത്തില്‍ വനിതാ എ.ഡി.ജി.പിയുടെ നേതൃത്വത്തില്‍ കേസ് തുടരന്വേഷിക്കണമെന്നാണു സമൂഹമാധ്യമത്തിലടക്കം പൊതുസമൂഹത്തില്‍ നിന്നുയരുന്ന ആവശ്യം. 

പോക്‌സോ ഒഴിവാക്കി കുറ്റപത്രം സമര്‍പ്പിച്ചതോടെ ഇരയുടെ കുടുംബത്തിനു നിലവിലുള്ള അന്വേഷണ സംഘത്തിലുള്ള വിശ്വാസം നഷ്ടപ്പെട്ടിരിക്കുകയാണ്. 

പ്രതിയുടെ ജാമ്യഹരജി പരിഗണിക്കുന്നതിനിടെ നേരത്തെ ഹൈക്കോടതിയും ജില്ലാ സെഷന്‍സ് കോടതിയും പ്രഥമദൃഷ്ട്യാ തെളിവുണ്ടെന്നും ബലാത്സംഗക്കുറ്റവും പോക്‌സോ ആക്ടും നിലനില്‍ക്കുമെന്നും കണ്ടെത്തിയിരുന്നു. ഈ സാഹചര്യത്തിലാണ് അന്നു പ്രതിക്കു ജാമ്യം നിഷേധിച്ചത്. 

കേസില്‍ ഭാഗിക കുറ്റപത്രമാണു ഇപ്പോള്‍ ക്രൈംബ്രാഞ്ച് അന്വേഷണ സംഘം തലശ്ശേരി അഡീഷണല്‍ ജില്ലാ കോടതിയില്‍ സമര്‍പ്പിച്ചത്. ഐ.ജിയുടെ മേല്‍നോട്ടത്തില്‍ അന്വേഷിച്ച കേസ് അതിനു താഴെയുള്ള ഉദ്യോഗസ്ഥനെ കൊണ്ട് അന്വേഷിക്കുന്നത് ഉചിതമല്ലെന്നും വനിതാ എ.ഡി.ജി.പിയെ കൊണ്ട് അന്വേഷിക്കണമെന്നും നിയമവിദഗ്ധരും ചൂണ്ടിക്കാട്ടുന്നു. കുറ്റപത്രത്തിന്റെ ഉള്ളടക്കം ശബ്ദസന്ദേശത്തിലൂടെ പുറത്തുവന്നതു സര്‍വിസ് ചട്ടലംഘനവും ഗുരുതരമായ സ്വഭാവദൂഷ്യവുമാണ്. 

അന്വേഷണം പൂര്‍ണമായില്ലെന്നു കോടതിയില്‍ ക്രൈംബ്രാഞ്ച് സമ്മതിച്ച സാഹചര്യത്തില്‍ വിദഗ്ധ അന്വേഷണം വേണം. ഇരയുടെ കുടുംബത്തിന്റെ സംശയം ദുരീകരിക്കാന്‍ വനിതാ എ.ഡി.ജി.പിയാകുമ്പോള്‍ കഴിയുമെന്നും ഇതിനു സര്‍ക്കാര്‍ തയാറാകണമെന്നുമാണാവശ്യം.