അമ്പലപ്പുഴ:  വാഹന പരിശോധനയ്ക്കിടയില്‍ കഞ്ചാവ്മായി കൊലപാതക കേസിലെ പ്രതിയുള്‍പ്പെടെ രണ്ട് പേര്‍ അറസ്റ്റില്‍ പുന്നപ്ര വടക്ക് പഞ്ചായത്ത് പറവൂര്‍ തറയില്‍ വീട്ടില്‍ സുരേഷിന്റെ മകന്‍ അരുണ്‍കുമാര്‍ (24), പറവൂര്‍ അരീത്തറ സിയോണില്‍ ബോസിന്റെ മകന്‍ ബിബിന്‍ ബോസ് (23) എന്നിവരെയാണ് പുന്നപ്ര എസ്.ഐ ശ്രീജിത്തിന്റെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തത്.
ഇന്നലെ വൈകുന്നേരത്തോടെ ദേശീയപാതയില്‍ വണ്ടാനത്ത് നടന്ന വാഹന പരിശോധനയിലാണ് ഇരുവരും അറസ്റ്റിലായത്.  പരിശോധയില്‍ നിന്നും പ്രതികള്‍ രക്ഷപെടാന്‍ ശ്രമിച്ചെങ്കിലും സാഹസികമായി പിടികൂടുകയായിരുന്നു.  പരിശോധനയില്‍ ഇവരില്‍നിന്നും കഞ്ചാവ് പൊതികള്‍ കണ്ടെടുത്തു. തുടര്‍ന്ന് പ്രതികളെ സ്റ്റേഷനിലെത്തിച്ച് നടത്തിയ ചോദ്യം ചെയ്യലില്‍ അരുണ്‍കുമാര്‍ ആലപ്പുഴ തലവടി ഭാഗത്ത് നടന്ന കൊലപാതക കേസുള്‍പ്പെടെ ആലപ്പുഴ നോര്‍ത്ത്, സൗത്ത്, പുന്നപ്ര തുടങ്ങിയ സ്റ്റേഷനുകളില്‍ നിരവധി ക്രിമിനല്‍ കേസുകളിലും പ്രതിയാണെന്ന് വ്യക്തമായി.
കൂട്ടുപ്രതിയായ ബിബിന്റെ പേരില്‍ പുന്നപ്ര പൊലിസ് സ്റ്റേഷനില്‍ മാത്രം അഞ്ചോളം ക്രിമിനല്‍ കേസ് നിലവിലുണ്ട്. അമ്പലപ്പുഴ കോടതിയില്‍ ഹാജരാക്കിയ പ്രതികളെ റിമാന്റ് ചെയ്തു. സീനിയര്‍ സിവില്‍ പൊലിസ് ഓഫിസര്‍മാരായ അഗസ്റ്റിന്‍, വില്ല്യം, സിദ്ധീക്ക്, പ്രതീപ്, സജീവ് എന്നിവരും പൊലിസ് സംഘത്തിലുണ്ടായിരുന്നു.