കോഴിക്കോട്: സുപ്രഭാതം ദിനപത്രത്തിന്റെ അഞ്ചാംവാര്‍ഷിക പ്രചാരണപരിപാടിക്ക് തുടക്കം. വരിക്കാരെ ചേര്‍ക്കല്‍ കാംപയിനിന്റെ സംസ്ഥാനതല ഉദ്ഘാടനം പ്രതിപക്ഷ നേതാവ് രമേശ് ചെന്നിത്തലയെ വാര്‍ഷിക വരിക്കാരനാക്കി സുപ്രഭാതം ഡയറക്ടറും കോഴിക്കോട് ഖാസിയുമായ സയ്യിദ് മുഹമ്മദ്‌കോയ തങ്ങള്‍ ജമലുല്ലൈലി നിര്‍വഹിച്ചു.
ആരംഭ ദിവസം മുതല്‍ താന്‍ സുപ്രഭാതം ദിനപത്രത്തിന്റെ വായനക്കാരനാണെന്നു ചെന്നിത്തല പറഞ്ഞു.
ന്യൂനപക്ഷങ്ങളുടെയും അധഃസ്ഥിതരുടെയും പിന്നോക്കവിഭാഗക്കാരുടെയും അവകാശങ്ങള്‍ക്കായി പടപൊരുതുന്ന മാധ്യമമെന്ന പ്രത്യേകത സുപ്രഭാതത്തിനുണ്ട്. അതേസമയം, ജനാധിപത്യ മതേതര മൂല്യങ്ങള്‍ മുറുകെപ്പിടിക്കുന്ന പത്രവുമാണ്.
ധാര്‍മികതയിലൂന്നിയ സുപ്രഭാതത്തിന്റെ മാധ്യമപ്രവര്‍ത്തനം മറ്റു പല പത്രങ്ങളും മാതൃകയാക്കേണ്ടതാണ്. ധര്‍മമാര്‍ഗത്തിലൂടെ മാത്രമേ മനുഷ്യനു ജീവിതവിജയം സാധിക്കൂ. വാക്കില്‍ ധര്‍മവും കര്‍മത്തില്‍ അധര്‍മവും എന്ന മുദ്രാവാക്യം ജീവിതവ്രതമാക്കിയവരാണ് ഇന്നു ധാരാളമുള്ളത്. മാധ്യമരംഗത്തും ആ ദുഷ്പ്രവണതയുണ്ട്.
അത്തരമൊരു സാഹചര്യത്തിലാണു നന്മയുടെ മാര്‍ഗത്തിലൂടെ മാത്രം ചരിക്കുകയെന്ന സുപ്രഭാതത്തിന്റെ നിലപാടു വെളിച്ചമായി മാറുന്നത്. നാലുവര്‍ഷംകൊണ്ട് അത്ഭുതകരമായ വിജയം കൈവരിക്കാന്‍ സുപ്രഭാതത്തിനു കഴിഞ്ഞതും അതുകൊണ്ടാണെന്നു ചെന്നിത്തല പറഞ്ഞു.
സുപ്രഭാതം മാനേജിങ് എഡിറ്റര്‍ നവാസ് പൂനൂര്‍, ഡെപ്യൂട്ടി സി.ഇ.ഒ ഐ.എം അബ്ദുറഹിമാന്‍, മാര്‍ക്കറ്റിങ് മാനേജര്‍ സി.പി അലവിക്കുട്ടി, സര്‍ക്കുലേഷന്‍ മാനേജര്‍ ഭാസ്‌കരന്‍ ചേലേമ്പ്ര, കോര്‍പ്പറേഷന്‍ കൗണ്‍സിലര്‍ അഡ്വ. പി.എം നിയാസ്, കെ.പി.സി.സി ജനറല്‍ സെക്രട്ടറി എന്‍. സുബ്രഹ്മണ്യന്‍ എന്നിവര്‍ പങ്കെടുത്തു.