ജയ്പൂര്‍: ഗെലോട്ടും സംഘവും തനിക്കെതിരെ കളിക്കുന്ന കളികള്‍കള്‍ക്ക് നിയമത്തിന്റെ വഴിയിലൂടെ മറുപടി പറയാനൊരുങ്ങി മുന്‍ പി.സി.സി പ്രസിഡന്റ് സച്ചിന്‍ പൈലറ്റ്. തനിക്കെതിരെ കോഴ ആരോപണം ഉന്നയിച്ച കോണ്‍ഗ്രസ് എം.എല്‍.എക്ക് വക്കീല്‍ നോട്ടിസയച്ചിരിക്കുകയാണ് അദ്ദേഹം. ബി.ജെ.പിയില്‍ ചേരുന്നതിന് മുന്‍ ഉപമുഖ്യമന്ത്രിയായ സച്ചിന്‍ പൈലറ്റ് തനിക്ക് 35 കോടി രൂപ വാഗ്ദാനം ചെയ്തെന്ന് ആരോപണമുന്നയിച്ച എം.എല്‍.എ ഗിരിരാജ് സിങ് മലിംഗക്കെതിരെയാണ് നോട്ടിസ് അയച്ചത്.

തിങ്കളാഴ്ച മാധ്യമങ്ങളോടാണ് സച്ചിന്‍ പൈലറ്റ് തനിക്ക് 35 കോടി വാഗ്ദാനം ചെയ്തതായി കോണ്‍ഗ്രസ് എം.എല്‍.എ വെളിപ്പെടുത്തിയത്. ഡിസംബര്‍ മുതല്‍ തുടര്‍ച്ചയായി ഇക്കാര്യം പൈലറ്റ് തന്നോട് ആവശ്യപ്പെട്ടതായും ചര്‍ച്ച നടത്തിയിരുന്നതായും എന്നാല്‍ വാഗ്ദാനം താന്‍ നിരസിക്കുകയായിരുന്നുവെന്നുമായിരുന്നുന്നു മലിംഗയുടെ വാദം.

ആരോപണം നിഷേധിച്ചുകൊണ്ട് കഴിഞ്ഞ ദിവസം പൈലറ്റ് തന്നെ നേരിട്ട് പ്രതികരിച്ചിരുന്നു. തന്നെ അപകീര്‍ത്തിപ്പെടുത്താന്‍ വേണ്ടിയുള്ള അടിസ്ഥാനരഹിതമായ ആരോപണമാണിതെന്നും നിയമനടപടി സ്വീകരിക്കുമെന്നും പൈലറ്റ് കഴിഞ്ഞ ദിവസം സാമൂഹിക മാധ്യമങ്ങളിലൂടെയുള്ള പ്രസ്താവനയില്‍ വ്യക്തമാക്കി. സംസ്ഥാന നേതൃത്വത്തിനെതിരെ ഉന്നയിച്ച ''ന്യായമായ ആശങ്കകള്‍'' തടയുന്നതിനായിട്ടാണ് ഇത്തരം ആരോപണങ്ങള്‍ ഉന്നയിക്കാന്‍ മലിംഗയെ പ്രേരിപ്പിച്ചതെന്നും സച്ചിന്‍ പറയുകയുണ്ടായി.