കിഴിശ്ശേരി: ഇരു വൃക്കകളും തകരാറിലായ തവനൂര്‍ മുണ്ടിലാക്കല്‍ മേത്തലയില്‍ ഷൈജുവിന്റെ ചികിത്സക്കായി ധനസഹായം തേടി സുഹൃത്തുക്കള്‍ റോഡ് നന്നാക്കാന്‍ ഇറങ്ങി. തവനൂര്‍ ഒന്നാംമൈല്‍ റെയ്‌സിങ് സ്റ്റാര്‍ ആര്‍ട്‌സ് & സ്‌പോര്‍ട്‌സ് ക്ലബിനു കീഴിലാണു കാരുണ്യ മനസുകളെ തേടി സുഹൃത്തുക്കള്‍ സേവനരംഗത്തിറങ്ങിയത്.
കിഴിശ്ശേരി തവനൂര്‍ റോഡില്‍ അടഞ്ഞു കൂടിയ മണ്ണുകള്‍ നീക്കം ചെയ്തും പൊട്ടിപ്പൊളിഞ്ഞ റോഡുകള്‍ നന്നാക്കിയും സേവന മനസ്സുമായി ഷൈജുവിന്റെ സുഹൃത്തുക്കള്‍ ഇറങ്ങിയതോടെ പണം നല്‍കി കാരുണ്യ പ്രവര്‍ത്തനങ്ങളോടു സഹകരിക്കാന്‍ യാത്രക്കാര്‍ തയ റായി.
ഇരു വൃക്കകളും തകരാറിലായ ഷൈജുവിനെ കോഴിക്കോട് മെഡിക്കല്‍ കോളേജിലെ ചികിത്സക്കു ശേഷം ഡയാലിസിസിന് വിധേയമാക്കുകയാണ്. ഭാരിച്ച സാമ്പത്തിക ചെലവു ചികിത്സക്കായി വേണ്ടി വന്നതോടെ കാരുണ്യ പ്രവര്‍ത്തനത്തിനായി ഒരു ദിവസം മാറ്റിവെച്ചു സേവനം ചെയ്യാന്‍ തീരുമാനിച്ചതെന്നു ക്ലബ് സെക്രട്ടറി കെ. പ്രണവു പറഞ്ഞു.
ടി.വി ഇബ്രാഹിം എംഎല്‍ എ രക്ഷാധികാരിയായി രൂപീകരിച്ച മേത്തലയില്‍ ഷൈജു സഹായ സമിതിയുടെ പേരില്‍ മുണ്ടക്കുളം വിജയാ ബാങ്ക് ശാഖയില്‍ 210501011001998 എന്ന നമ്പറില്‍ അക്കൗണ്ട് തുറന്നിട്ടുണ്ട്.