തൊടുപുഴ: പെമ്പിളൈ ഒരുമൈ സമരത്തിന് ഐക്യദാര്‍ഢ്യം പ്രഖ്യാപിച്ച് മുന്‍ മുഖ്യമന്ത്രി ഉമ്മന്‍ചാണ്ടി മൂന്നാറിലെത്തി. പ്രാദേശിക കോണ്‍ഗ്രസ് നേതാക്കളുടെ എതിര്‍പ്പ് അവഗണിച്ചാണ് അദ്ദേഹം സമര പ്പന്തലിലെത്തിയത്. സമരത്തിനു യു.ഡി.എഫിന്റെ പിന്തുണയും അദ്ദേഹം വാഗ്ദാനം ചെയ്തു. പെമ്പിളൈ ഒരുമൈയുടെ സമരപ്പന്തലിലേക്ക് ഉമ്മന്‍ചാണ്ടി പോകരുതെന്ന് കെ.പി.സി.സി വൈസ് പ്രസിഡന്റ് എ.കെ മണി ആവശ്യപ്പെട്ടിരുന്നു. ഉമ്മന്‍ചാണ്ടി പോയാലും പ്രാദേശിക നേതാക്കള്‍ പോകില്ലെന്ന് എ.കെ മണി പറഞ്ഞു. മറ്റൊരു സംഘടന നടത്തുന്ന സമരം ഏറ്റെടുക്കേണ്ടതില്ലെന്നായിരുന്നു മണിയുടെ നിലപാട്. ഈ അഭിപ്രായത്തെ പാടെ അവഗണിച്ചാണ് ഉമ്മന്‍ചാണ്ടി സമരപ്പന്തലിലെത്തിയത്. നേതാക്കളായ പി.സി വിഷ്ണുനാഥ്, ജോസഫ് വാഴയ്ക്കന്‍, ലാലി വിന്‍സന്റ്, എ.കെ മണി, സി.പി ജോണ്‍, ജോണി നെല്ലൂര്‍, കെ.എം.എ ഷുക്കൂര്‍, റോയി.കെ പൗലോസ് എന്നിവരും സമര വേദിയില്‍ പിന്തുണയുമായി എത്തി.
എം.എം മണിയെ പിന്തുണയ്ക്കുന്ന മുഖ്യമന്ത്രിയാണ് ജനങ്ങളുടെ മുന്നില്‍ പ്രതിക്കൂട്ടിലായിരിക്കുന്നതെന്ന് ഉമ്മന്‍ചാണ്ടി കുറ്റപ്പെടുത്തി. പാര്‍ട്ടിതല അച്ചടക്ക നടപടിക്കപ്പുറം മണിയെ മന്ത്രിസഭയില്‍ നിന്ന് പുറത്താക്കണമെന്നും അദ്ദേഹം ആവശ്യപ്പെട്ടു. ഉദ്യോഗസ്ഥരെയും മാധ്യമങ്ങളെയും മണി നിരന്തരം അപമാനിക്കുന്നു. സ്ത്രീവിരുദ്ധ പരാമര്‍ശം നടത്തിയ മണിയെ എതിര്‍ക്കുന്ന സമീപനമാണ് യു.ഡി.എഫ് നടത്തുന്നതെന്നും അദ്ദേഹം പറഞ്ഞു.