മുംബൈ: വിമാനത്തില്‍വച്ച് ഇന്ത്യക്കാരിയെ വംശീയമായി അധിക്ഷേപിക്കുകയും മര്‍ദിക്കുകയും ചെയ്ത വിദേശ പൈലറ്റിനെതിരേ നടപടി ആവശ്യപ്പെട്ട് ക്രിക്കറ്റ് താരം ഹര്‍ഭജന്‍ സിങ് രംഗത്ത്. അംഗവൈകല്യമുള്ള മറ്റൊരാളെയും ഇയാള്‍ വംശീയമായി അധിക്ഷേപിച്ചതായി ഹര്‍ഭജന്‍ ട്വീറ്റ് ചെയ്തു.
ജെറ്റ് എയര്‍വേസില്‍ പൈലറ്റായ ബെര്‍നാഡ് ഹോസ്‌ലിനിനെതിരേയാണ് ഹര്‍ഭജന്‍ നടപടി ആവശ്യപ്പെട്ട് രംഗത്തെത്തിയത്. കൂടെയുണ്ടായിരുന്ന ഇന്ത്യന്‍ യാത്രക്കാരിയെ പൈലറ്റ് വംശീയാധിക്ഷേപം നടത്തുകയും ശാരീരികമായി മര്‍ദിക്കുകയും ചെയ്തതായി താരം ആരോപിച്ചു.
വൃത്തികെട്ട ഇന്ത്യക്കാരന്‍ വിമാനത്തില്‍നിന്ന് ഇറങ്ങൂവെന്ന് അംഗവൈകല്യമുള്ള ഇന്ത്യക്കാരനോട് ഇയാള്‍ ബഹളംവച്ചതായി ഹര്‍ഭജന്‍ ട്വീറ്റ് ചെയ്തു.
എന്നാല്‍, എവിടെവച്ചാണ് സംഭവം നടന്നതെന്നോ മറ്റു വിശദവിവരങ്ങളോ താരം പുറത്തുവിട്ടിട്ടില്ല. ഇത്തരം പ്രവണതകള്‍ പൊറുപ്പിക്കരുതെന്ന് അദ്ദേഹം പറഞ്ഞു.