തിരുവനന്തപുരം: സ്വര്‍ണക്കടത്തു കേസുമായി ബന്ധപ്പെട്ടുള്ള അന്വേഷണത്തിന്റെ ഭാഗമായി എന്‍.ഐ.എ ആവശ്യപ്പെട്ട സെക്രട്ടേറിയറ്റിലെ സി.സി.ടി.വി ദൃശ്യങ്ങള്‍ നല്‍കാന്‍ സര്‍ക്കാര്‍ തീരുമാനം. ദൃശ്യങ്ങള്‍ നല്‍കാന്‍ ചീഫ് സെക്രട്ടറി ഹൗസ് കീപ്പിങിന്റെ ചുമതലയുള്ള അഡീഷണല്‍ സെക്രട്ടറി ഹണിക്ക് നിര്‍ദേശം നല്‍കി.
മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കറിന്റെ ഓഫിസ്, ഓഫിസ് സ്ഥിതിചെയ്യുന്ന സെക്രട്ടറിയേറ്റിലെ നോര്‍ത്ത് ബ്ളോക്ക്, കന്റേണ്‍മെന്റ് ഗേറ്റ് എന്നിവിടങ്ങളിലെ ദൃശ്യങ്ങളാണ് എന്‍.ഐ.എ ആവശ്യപ്പെട്ടത്.
സ്വര്‍ണക്കടത്ത് കേസിലെ മുഖ്യപ്രതികളായ സ്വപ്നയും സരിത്തും മന്ത്രിമാരുടെയും ഉന്നത ഉദ്യോഗസ്ഥരുടെയും ഓഫിസുകളില്‍ പതിവായി എത്താറുണ്ടായിരുന്നതായി കണ്ടെത്തിയതിനെത്തുടര്‍ന്നാണ് ഇതു ഉറപ്പിക്കാന്‍ എന്‍.ഐ.എ ദൃശ്യം പരിശോധിക്കാന്‍ തീരുമാനിച്ചത്. എഡിറ്റ് ചെയ്യാത്ത കോപ്പിയാണ് ആവശ്യപ്പെട്ടത്.
നേരത്തെ കസ്റ്റംസ് ദൃശ്യങ്ങള്‍ ആവശ്യപ്പെട്ടപ്പോള്‍ സി.സി.ടി.വി വര്‍ക്ക് ചെയ്യുന്നില്ലെന്നും ഇടി മിന്നലില്‍ നശിച്ചു പോയി എന്നുമായിരുന്നു പൊതുഭരണ വകുപ്പ് മറുപടി നല്‍കിയത്. സി.സി.ടി.വി കാമറ കേടായാലും ദൃശ്യങ്ങള്‍ നഷ്ടപ്പെടില്ലെന്നുള്ള സാങ്കേതിക വിദഗ്ധരുടെ അഭിപ്രായത്തെ തുടര്‍ന്നാണ് ദൃശ്യങ്ങള്‍ കൈമാറാന്‍ തീരുമാനിച്ചതെന്നാണ് സൂചന.
സരിതും സ്വപ്നയും സന്ദീപ് നായരും അറസ്റ്റിലായപ്പോള്‍ തന്നെ ശിവശങ്കറുമായി ബന്ധപ്പെട്ട കാര്യങ്ങളില്‍ ചീഫ് സെക്രട്ടറിയില്‍ നിന്നു എന്‍.ഐ.എ വിവരങ്ങള്‍ തേടിയിരുന്നു. അതിനു പിന്നാലെയാണ് ദൃശ്യങ്ങള്‍ തേടി എന്‍.ഐ.എ സെക്രട്ടേറിയറ്റിലെത്തിയത്.