കരുളായി: ജനവാസ കേന്ദ്രത്തിലിറങ്ങിയ കാട്ടാന മധ്യ വയസ്‌കനെ ചവിട്ടി കൊന്നു.മൂത്തേടം വട്ടപ്പാടത്താണ് സംഭവം.

ഏനാന്തി കരുവാംകുഴി സ്വദേശി പുത്തന്‍പുരക്കല്‍ തോമസിന്റെ മകന്‍ മത്തായി(55)യെയാണ് ശനിയാഴ്ച്ച പുലര്‍ച്ചെ രണ്ടു മണിയോടെ ആന ആക്രമിച്ചു കൊലപ്പെടുത്തിയത്.

കരുളായി വനത്തില്‍നിന്നു നാരങ്ങാപ്പൊട്ടി വഴി വട്ടപ്പാടം കോളനി ഭാഗത്തെത്തിയ ആന ഭീതി പരത്തിയ ശേഷം കോളനിയോട് ചേര്‍ന്നുള്ള പൂന്തുരുത്തി അബ്ദുറഹിമാന്റെ ഉടമസ്ഥതയിലുള്ള സ്ഥലത്ത് പ്രവേശിക്കുകയും ചിന്നം വിളിക്കുകയും ചെയ്തിരുന്നു. തുടര്‍ന്ന് വട്ടപ്പാടം കോളനിയിലുള്ളവര്‍ തിരച്ചില്‍ നടത്തിയപ്പോഴാണ് ശരീരമാസകലം പരുക്കുകളോടെ മത്തായിയുടെ മൃതദേഹം കണ്ടത്.

അബ്ദുറഹിമാന്റെ പഴയവീട്ടില്‍ വാടകയ്ക്ക് താമസിക്കുകയായിരുന്നു മത്തായി. കഴിഞ്ഞ ദിവസം ഏറെ വൈകി ഇവിടെയെത്തിയ മത്തായി തന്റെ ജീപ്പിനുള്ളില്‍ തന്നെ കിടക്കുകയായിരുന്നു.

നാട്ടുകാര്‍ വിവരമറിയിച്ചതിനെ തുടര്‍ന്ന് പടുക്ക ഫോറസ്റ്റ് സ്റ്റേഷനിലെ ജീവനക്കാരും പൂക്കോട്ടുംപാടം പൊലിസും സ്ഥലത്തെത്തി. പരിശോധനകള്‍ പൂര്‍ത്തിയാക്കിയ ശേഷം മൃതദേഹം നിലമ്പൂര്‍ ജില്ലാ ആശുപത്രിയില്‍ പോസ്റ്റ് മോര്‍ട്ടം നടത്തി.

കരുളായി വനത്തിലെ ശങ്കരകോടിലെ സ്വകാര്യ വ്യക്തിയുടെ തോട്ടത്തിലെ കാവല്‍ക്കാരനാണ് മത്തായി. മാതാവ്: ശോശമ, സഹോദരങ്ങള്‍: സണ്ണി, ജോയി, കുഞ്ഞുമോള്‍, ലില്ലി, ലിസി, മിനി. സംസ്‌ക്കാരം പുല്ലഞ്ചേരി മര്‍ത്തോമ പള്ളി സെമിത്തേരിയില്‍ നടന്നു.