മലയിന്‍കീഴ്  : ഓട്ടോറിക്ഷാ ഡ്രൈവറെ മര്‍ദ്ദിച്ച് രൂപയും മൊബൈല്‍ ഫോണും തിരിച്ചറിയല്‍ കാര്‍ഡും കവര്‍ന്ന കേസില്‍ ഒളിവില്‍ കഴിഞ്ഞിരുന്ന പ്രതികളില്‍ ഒരാളെക്കൂടി പൊലിസ് പിടികൂടി.
വിളപ്പില്‍ശാല ചെറുപ്പാറ അഖില്‍ ഭവനില്‍ അരുണിനെ(23)യാണ് പിടികൂടിയത്. പാറശാല കാരോട് കുഴിഞ്ഞാംവിള വടുവൂര്‍കോണം ഹരിജന്‍ കോളനിയില്‍ എല്‍. ഷിബുലാലിനെയാണ് (31) ആക്രമിച്ച് പണം കവര്‍ന്നത്.
ഇക്കഴിഞ്ഞ 14 ന് രാത്രി 12 ന് തമ്പാനൂരില്‍ നിന്ന് പേയാട് ഭാഗത്തേക്ക് സവാരി വിളിച്ച നാലംഗ സംഘം കുരിശുമുട്ടത്ത് എത്തിയപ്പോള്‍ ഇടറോഡിലൂടെ പോകാന്‍ ആവശ്യപ്പെട്ടു. ഓട്ടോറിക്ഷ നിറുത്തുന്നതിനിടെ രണ്ട് പേര്‍ ചേര്‍ന്ന് ഷിബുലാലിനെ മര്‍ദ്ദിച്ചു. ശേഷം 900 രൂപ അടങ്ങിയ പഴ്‌സും മൊബൈല്‍ ഫോണും പിടിച്ചുപറിക്കുകയായിരുന്നു.
 മലയിന്‍കീഴ് പൊലിസില്‍ പരാതി നല്‍കിയതിനെ തുടര്‍ന്ന് വിളപ്പില്‍ ചീലപ്പാറ ഐശ്വര്യാ ഭവനില്‍ അമല്‍ എസ്. കുമാര്‍(18), വിളപ്പില്‍ ചീലപ്പാറ സ്വദേശി രാജേഷ് ഏലിയാസ്, എസ്. കട്ടു (18)എന്നിവരെ നേരത്തേ പൊലിസ് അറസ്റ്റ് ചെയ്തിരുന്നു.
  മലയിന്‍കീഴ് സി.ഐ ടി. ജയകുമാര്‍, ഷാഡോ പൊലിസ് ഓഫിസര്‍ സുനില്‍ എന്നിവരുടെ നേതൃത്വത്തില്‍ അറസ്റ്റ് ചെയ്ത പ്രതിയെ ഇന്ന് കോടതിയില്‍ ഹാജരാക്കും. കേസിലെ ഒരു പ്രതി ഇപ്പോഴും ഒളിവിലാണ്.