തിരുവനന്തപുരം: മില്‍മാ ജീവനക്കാരുടെ സംഘടനയായ കോപ്പറേറ്റീവ് മില്‍ക് മാര്‍ക്കറ്റിങ് എംപ്ലോയീസ് ഫെഡറേഷന്റെ (സി.ഐ.ടി.യു) 24-ാമത് സംസ്ഥാന സമ്മേളനം മേയ് 14ന് കോഴിക്കോട് സംഘടിപ്പിക്കും. പെരിങ്ങളത്ത് നടക്കുന്ന സമ്മേളനം വൈകുന്നേരം നാലിന് സി.ഐ.ടി.യു സംസ്ഥാന ജനറല്‍ സെക്രട്ടറി എളമരം കരീം ഉദ്ഘാടനം ചെയ്യുമെന്ന് ഫെഡറേഷന്‍ ജനറല്‍ സെക്രട്ടറി എസ.് ബാഹുലേയന്‍ വാര്‍ത്തസമ്മേളനത്തില്‍ അറിയിച്ചു. വൈകുന്നേരം ആറിന് നടക്കുന്ന പൊതുസമ്മേളനം സി.ഐ.ടി.യു അഖിലേന്ത്യാ സെക്രട്ടറി കെ. ചന്ദ്രന്‍പിള്ള ഉദ്ഘാടനം ചെയ്യും. നിലവിലെ ത്രിതല സംവിധാനം മാറ്റി സഹകരണ നിയമമനുസരിച്ചുള്ള പ്രൈമറി അപക്‌സ് സംവിധാനം മില്‍മയിലും കൊണ്ടുവരണമെന്ന ആവശ്യം ഈ സമ്മേളനം വീണ്ടും ഉന്നയിക്കുമെന്ന് അദ്ദേഹംപറഞ്ഞു. മില്‍മയിലെ ഭരണപരമായ ചെലവും നിയന്ത്രിച്ച് അത് കര്‍ഷകരുടെ ക്ഷേമത്തിന് നല്‍കണമെന്നും മില്‍മയിലെ മുഴുവന്‍ നിയമനങ്ങളും പി.എസ്.സിക്ക് വിടണമെന്നും സമ്മേളനം ആവശ്യപ്പെടുമെന്നും അദ്ദേഹം പറഞ്ഞു. വാര്‍ത്താസമ്മേളനത്തില്‍ ഭാരവാഹികളായ ഹരികുമാര്‍, ബൈജു, വിജയാനന്ദന്‍, ഷെറീഫ് പങ്കെടുത്തു.