നെടുങ്കണ്ടം: നെടുങ്കണ്ടം ടൗണില്‍ ബൈക്ക് മോഷ്ടിച്ച തമിഴ്‌നാട് സ്വദേശിയായ കൗമാരക്കാരനെ നെടുങ്കണ്ടം പൊലിസ് നാട്ടുകാരുടെ സഹായത്തോടെ പിടികൂടി. ബോഡിനായ്ക്കന്നൂര്‍ ഊരാണിക്കുളം തേരടിതെരവില്‍ ഗൗതം(19) ആണ് അറസ്റ്റിലായത്.
സംഭവത്തെക്കുറിച്ച് പൊലിസ് പറയുന്നത് ഇങ്ങനെ: കഴിഞ്ഞ ദിവസം ഗൗതം ബോഡിനായ്ക്കന്നൂരില്‍ നിന്ന് ബോഡിമെട്ട് ചെക്‌പോസ്റ്റിലൂടെ തമിഴ്‌നാട് ട്രാന്‍സ്‌പോര്‍ട്ട് ബസില്‍ നെടുങ്കണ്ടത്ത് എത്തി. ടൗണില്‍ കറങ്ങി നടക്കുന്നതിനിടെയാണ് നെടുങ്കണ്ടം കിഴക്കേകവലയക്ക് സമീപം പാര്‍ക്കു ചെയ്തിരുന്ന മൈനര്‍സിറ്റി സ്വദേശി ഷിഹാബിന്റെ ബൈക്ക് മോഷ്ടിച്ചു.
കോമ്പയാര്‍ ഭാഗത്ത് കൂടി ബോഡിമെട്ട് ചെക്‌പോസ്റ്റ് കടക്കാനാണ് പ്രതി ശ്രമിച്ചത്. കോമ്പയാറില്‍ മോഷ്ടിച്ച ബൈക്കുമായെത്തിയ പ്രതി നാട്ടുകാരോട് ബോഡിമെട്ട് പോകുന്നതിന് വഴി ചോദിച്ചു. ബൈക്ക് ഓഫ് ചെയ്യാതെ വഴി ചോദിച്ചതും, ബൈക്കിന്റെ നമ്പര്‍ പ്ലേറ്റ് മടക്കി വച്ചതും, ശ്രദ്ധയില്‍പ്പെട്ട നാട്ടുകാര്‍ വിവരം നെടുങ്കണ്ടം പൊലിസ് സ്റ്റേഷനില്‍ അറിയിച്ചു.
പൊലിസ് പ്രതിയെയും കസ്റ്റഡിയിലെടുത്ത് ചോദ്യം ചെയ്തപ്പോഴാണ് നെടുങ്കണ്ടത്ത് നിന്നും മോഷണം പോയ ബൈക്കാണിതെന്ന് കണ്ടെത്തിയത്. നെടുങ്കണ്ടം സി.ഐ റെജി. എം. കുന്നിപ്പറമ്പന്‍, എ.എസ്.ഐ സി.ബി. റെജിമോന്‍, സി.പി.ഒ. മാരായ സന്തോഷ് വര്‍ഗീസ്, എ.എസ്. വിഷ്ണു, ഡി. സതീഷ്, എസ്. നിയാസ് എന്നിവരടങ്ങിയ സംഘമാണ് പ്രതിയെ പിടികൂടിയത്.