ചാരുംമൂട്: കുടശ്ശനാട് പുലികുന്ന് വഴി കടന്നു പോകുന്ന ആദിക്കാട്ടുകുളങ്ങര റോഡിന്റെ ഇരുവശങ്ങളിലും അറവു മാലിന്യങ്ങളും ഹോട്ടലിലെ ആഹാര അവശിഷ്ടങ്ങളും സ്ഥിരമായി നിക്ഷേപിക്കുന്നത് കാരണം ഇതുവഴിയുള്ള യാത്ര ദുര്‍ഗന്ധപൂരിതമാണെന്ന് നാട്ടുകാര്‍. കുടശ്ശനാട് ജങ്ഷനില്‍ നിന്നാരംഭിക്കുന്ന റോഡിന്റെ ഇരുവശങ്ങളിലും പാഴ്‌ച്ചെടികള്‍ വളര്‍ന്ന് പന്തലിച്ചു നില്‍ക്കുന്നതിനാല്‍ ഇവിടങ്ങളില്‍ നിക്ഷേപിക്കുന്ന അറവു മാലിന്യങ്ങള്‍ ചീഞ്ഞുനാറുമ്പോഴാണ് നാട്ടുകാര്‍ അറിയുന്നത്.
ദൂരെ സ്ഥലങ്ങളില്‍നിന്ന് ഇവിടെ മാലിന്യം നിക്ഷേപിക്കാന്‍ എത്തുന്നവരുമുണ്ടെന്ന് സമീപവാസികള്‍ പറയുന്നു. തെരുവ് നായ്ക്കളുടെ ശല്യവും ഭീഷണി ഉയര്‍ത്തുന്നു. റോഡിന്റെ കാടുപിടിച്ചു കിടക്കുന്ന സ്ഥലങ്ങള്‍ അടിയന്തരമായി വൃത്തിയാക്കണമെന്നാണ് നാട്ടുകാര്‍ ആവശ്യപ്പെടുന്നത്.