മോസ്‌കോ: എസ്-400 മിസൈല്‍ പ്രതിരോധ സംവിധാനം ചൈനയ്ക്ക് കൈമാറുന്നത് റദ്ദാക്കിയതായി റഷ്യ. റഷ്യയുടെ അപ്രതീക്ഷിത നടപടി അയല്‍ രാജ്യങ്ങളുടെ ഭൂമി കൈയേറുന്ന ചൈനക്ക് തിരിച്ചടിയായി. മിസൈല്‍ കൈമാറണമോ എന്ന കാര്യം പുനരാലോചിച്ച ശേഷമേ ഇക്കാര്യത്തില്‍ തുടര്‍ നടപടിയുണ്ടാകൂവെന്നും റഷ്യ അറിയിച്ചു.
2018ല്‍ ആദ്യ ശ്രേണിയിലെ മിസൈലുകള്‍ ചൈനക്ക് റഷ്യ കൈമാറിയിരുന്നു. 400 കി.മീ ദൂരപരിധിയിലെ മിസൈലുകളെയും വിമാനങ്ങളെയും തകര്‍ക്കാന്‍ കഴിവുള്ള എസ്-400 റഷ്യയുടെ നൂതന വിമാനവേധ മിസൈല്‍ സംവിധാനമാണ്.
ചൈനീസ് മാധ്യമമായ സോഹുവാണ് ഇതു സംബന്ധിച്ച റിപ്പോര്‍ട്ട് പുറത്തുവിട്ടത്. എസ്-400 മിസൈല്‍ സംവിധാനം കൈമാറുന്നത് മാറ്റിവച്ചതായി റഷ്യ അറിയിച്ചെന്നാണ് പത്രം പറയുന്നത്. ചൈന ചാരവൃത്തി നടത്തുന്നതായി റഷ്യ ആരോപിച്ചതിനു പിന്നാലെയാണ് എസ്-400 കൈമാറ്റം നിര്‍ത്തിവച്ചിരിക്കുന്നത്.