കരുളായി: ബാലങ്കുളത്തെ ജനവാസമേഖലയിലിറങ്ങിയ  ഒറ്റയാന്‍ വ്യാപകമായി കൃഷി നശിപ്പിച്ചു. കുമ്മാളി അഹമ്മദ്കുട്ടി, കുരിക്കള്‍ സലാം, പൊത്തന്‍ ജമീല എന്നിവരുടെ വാഴ, കവുങ്ങ്, തെങ്ങ് തുടങ്ങിയവയാണ് നശിപ്പിച്ചത്. ബുധനാഴ്ച സന്ധ്യയോടെ ഒറ്റയാന്‍ പ്രദേശത്ത് എത്തിയിരുന്നെങ്കിലും നാട്ടുകാര്‍ ഇതിനെ കാട്ടിലേക്ക് ഓടിച്ചിരുന്നു. തുടര്‍ന്ന് പുലര്‍ച്ചെ ഒരുമണിയോടെ ജനവാസ കേന്ദ്രത്തിലിറങ്ങിയാണ് കൃഷി നശിപ്പിച്ചത്.
 ഈ വീടുകളിലെ പ്ലാവുകളില്‍ നിന്ന് ചക്കയും പറിച്ച് ഭക്ഷിച്ചാണ് ആന കാടുകയറിയത്.  ബാലങ്കുളം വരെ വന്നു നില്‍ക്കുന്ന കരിങ്കല്‍ ഭിത്തി നീട്ടി പ്രദേശത്തെ വന്യമൃഗ ശല്യം തടയണമെന്ന് നാട്ടുകാര്‍ ആവശ്യപ്പെട്ടു.