കാവനൂര്‍: എളയൂര്‍ മല്‍ജഉല്‍ ഐതാം യതീംഖാന കാംപസ് ഇനി നിത്യഹരിത കാംപസ് .

യതീംഖാനയുടെ വിവിധ സ്ഥാപനങ്ങളിലെ വിദ്യാര്‍ഥികളാണ് വ്യത്യസ്ത ഹരിത വൃക്ഷത്തൈകള്‍ നട്ടുപിടിപ്പിച്ച് കാംപസിനെ ഹരിത ഭൂമിയാക്കാന്‍ നേതൃത്വം നല്‍കുന്നത്.

ജൂണ്‍ 5 പരിസ്ഥിതി ദിനത്തോടനുബന്ധിച്ച് യതീംഖാനക്കു കീഴില്‍ പ്രവര്‍ത്തിക്കുന്ന ആട്‌സ് & സയന്‍സ് കോളെജ് വിദ്യാര്‍തിഥികള്‍ 5 വര്‍ഷത്തെ ഹരിത ക്യാമ്പസ് പദ്ധതി നടപ്പിലാക്കാന്‍ മുന്നിട്ടിറങ്ങിയതേടെയാണ്  പദ്ധതിയുടെ ആരംഭം കുറിച്ചത്.


ഒരു ഏക്കര്‍ സ്ഥലത്ത് സ്ഥിതി ചെയ്യുന്ന സയന്‍സ് കോളെജ്, ഹയര്‍ സെക്കണ്ടറി സ്‌കൂള്‍, യു.പി സ്‌കൂള്‍, ഹൈസ്‌ക്കൂള്‍, ഐ.ടി.സി, ഹയര്‍ സെക്കണ്ടറി മദ്‌റസ എന്നിവയുടെ പരിസരത്താണ് ഹരിത കാംപസ് പദ്ധതിയുടെ ഒന്നാം ഘട്ടം നടപ്പിലാക്കുന്നത്.


വൃക്ഷതൈകള്‍ ശേഖരിക്കല്‍, നടീല്‍, ജൈവവളപ്രയോഗം, പരിചരണം, എന്നിവക്ക് ക്യാംപസിലെ വിദ്യാര്‍ഥികള്‍  തന്നെ നേതൃത്വം നല്‍കും.


തൈകള്‍ നടല്‍ ഉദ്ഘാടനം മല്‍ജഉല്‍ ഐതാം യതീംഖാന സെക്രട്ടറി കെ.ടി മുഹമ്മദലി മാസ്റ്റര്‍ നിര്‍വ്വഹിച്ചു.കോളെജ് പ്രിന്‍സിപ്പാള്‍ ഡോ. ആലസന്‍കുട്ടി, ഹയര്‍ സെക്കണ്ടറി പ്രിന്‍സിപ്പാള്‍ മുഹമ്മദ് കുട്ടി മാസ്റ്റര്‍, ഹൈസ്‌കൂള്‍ ഹെഡ്മാസ്റ്റര്‍ അബ്ദുറഹിമാന്‍ മാസ്റ്റര്‍, ശാഹിദ് മാസ്റ്റര്‍, പ്രൊഫ. നാസര്‍, നിസാമുദ്ധീന്‍, ശ്രീലാല്‍, സുഹൈല്‍, ഫാഇസ്, സാഹിറ, എന്നിവര്‍ നേതൃത്വം നല്‍കി.