വാദീഖുബാ : എസ്.എം.എഫ് ദേശീയ പ്രതിനിധി സംഗമത്തിന് മാതൃകാപരമായ ആതിഥ്യമൊരുക്കി എസ്.എം.എഫ് തൃശൂര്‍ ജില്ലാ കമ്മിറ്റി. രണ്ടു ദിവസങ്ങളിലായി മലബാര്‍ എന്‍ജിനീയറിങ് കോളജില്‍ നടന്ന പ്രതിനിധി സംഗമത്തിനെത്തിയ അയ്യായിരത്തോളം മഹല്ല് ഭാരവാഹികള്‍ക്ക് ഭക്ഷണം, കുടിവെള്ളം, ശീതീകരിച്ച ക്യാംപ് ഹാള്‍, ഗതാഗതം തുടങ്ങിയ സൗകര്യങ്ങള്‍ കുറ്റമറ്റ രീതിയില്‍ ഒരുക്കിയത് എസ്.എം.എഫ് തൃശൂര്‍ ജില്ലാ കമ്മിറ്റിയുടെ നേതൃത്വത്തില്‍ ആയിരുന്നു.
ജില്ലാ കമ്മിറ്റിക്കു കീഴില്‍ എസ്.കെ.എസ്.എസ്.എഫ് വിഖായ വളണ്ടിയര്‍മാര്‍, മലബാര്‍ എന്‍ജിനീയറിങ് കോളജ് എന്‍.എസ്.എസ് വളണ്ടിയര്‍മാര്‍, ദാറുല്‍ ഹുദാ പി.ജി ഒന്നാം വര്‍ഷ വിദ്യാര്‍ഥികള്‍ എന്നിവരാണ് സംഗമത്തിന് വേണ്ട സംവിധാനങ്ങള്‍ തയാറാക്കിയത്. ചെറുവാളൂര്‍ ഹൈദ്രോസ് മുസ്‌ലിയാര്‍, ഹംസ ബിന്‍ ജമാല്‍, റംലി ബശീര്‍ കല്ലേപാടം എന്നിവരുടെ നേതൃത്വത്തില്‍ ബശീര്‍ ഫൈസി ദേശമംഗലം, ഉസ്മാന്‍ കല്ലാട്ടയില്‍, ശംസുദ്ദീന്‍ വില്ലനൂര്‍, വി.എം മുബാറക്, ഷാഹിദ് കോയ തങ്ങള്‍, ഇല്യാസ് ഫൈസി തുടങ്ങിയ വിവിധ പോഷക സംഘടനാ ഭാരവാഹികളാണ് പ്രവര്‍ത്തനങ്ങള്‍ക്ക് നേതൃത്വം നല്‍കിയത്.