മുക്കം: മുക്കം മുസ്‌ലിം ഓര്‍ഫനേജ് മദ്‌റസയില്‍ നടന്ന തെരഞ്ഞെടുപ്പ് വിദ്യാര്‍ഥികള്‍ക്ക് കൗതുകമായി
മദ്‌റസ ലീഡര്‍, ആര്‍ട്‌സ് സെക്രട്ടറി തുടങ്ങിയ സ്ഥാനങ്ങളിലേക്കാണ് തെരഞ്ഞെടുപ്പ് നടന്നത്. തെരഞ്ഞെടുപ്പിന്റെ മുഴുവന്‍ പെരുമാറ്റചട്ടങ്ങളും വ്യവസ്ഥകളും നിലനിന്ന ഇലക്ഷനില്‍ ദിവസങ്ങളോളം സ്ഥാനാര്‍ഥികള്‍ വോട്ട് അഭ്യര്‍ഥിക്കുകയും ചെയ്തു. ആവേശകരമായ കൊട്ടിക്കലാശത്തിന് ശേഷം അരങ്ങേറിയ തെരഞ്ഞെടുപ്പ് പ്രക്രിയകള്‍ 'സമാധാനപരമായി' പൂര്‍ത്തീകരിക്കുകയും ചെയ്തു. തെരഞ്ഞെടുപ്പ് നടപടികള്‍ക്കായി പ്രിസൈഡിങ് ഓഫിസര്‍, പോളിങ് ഓഫിസര്‍, പോളിങ് മെഷീന്‍, ബൂത്ത് ഏജന്റുമാര്‍ തുടങ്ങി ഒരു യഥാര്‍ഥ തെരഞ്ഞെടുപ്പിന്റെ മുഴുവന്‍ സുജ്ജീകരണങ്ങളും ഒരുക്കിയിരുന്നു.
ഓര്‍ഫനേജ് മദ്‌റസ സദര്‍ മുഅല്ലിം എം. അബ്ദുല്‍ മജീദ് മുസ്‌ലിയാരുടെ മേല്‍നോട്ടത്തില്‍ നടന്ന തെരഞ്ഞെടുപ്പ് പ്രക്രിയകള്‍ക്ക് മുഹമ്മദ്‌കോയ ഹുദവി, ഉസ്മാന്‍ അസ്‌ലമി, മുഹമ്മദ് മുസ്‌ലിയാര്‍, ഇഫ്തിഖാര്‍ അല്‍ ഖാസിമി, അബ്ദുല്ല അശ്അരി, റസീല ടീച്ചര്‍, ജാസ്മിന്‍ അടിവാരം തുടങ്ങിയവര്‍ നേതൃത്വം നല്‍കി.