സ്വന്തം ലേഖകന്‍

കുറ്റ്യാടി: ജില്ലയിലും വിശിഷ്യാ കുറ്റ്യാടി പ്രദേശങ്ങളിലും സമസ്തയുടെ പ്രയാണത്തിനു ശക്തി പകര്‍ന്ന മഹത്‌വ്യക്തിയായിരുന്നു ഇന്നലെ വിടപറഞ്ഞ ചാലില്‍ സയ്യിദ് അബ്ദുറഹിമാന്‍ കുഞ്ഞിസീതി തങ്ങള്‍ എന്ന സി.എസ്.കെ തങ്ങള്‍. തങ്ങളുടെ വേര്‍പാടോടെ നാടിനു നഷ്ടമായത് മത-സാംസ്‌കാരിക രംഗത്തെ കരുത്തനായ നേതാവിനെയാണ്. ചെറുപുഞ്ചിരിയോടെയുള്ള സമീപനമാണ് അദ്ദേഹത്തെ മറ്റുള്ളവരില്‍ നിന്ന് വ്യത്യസ്തനാക്കിയത്. പാലേരിയാണു സ്വദേശമെങ്കിലും മറുനാട്ടിലടക്കം കുറ്റ്യാടിക്കാരനായാണ് അദ്ദേഹം അറിയപ്പെട്ടത്.
സമസ്ത കേരള ജംഇയ്യത്തുല്‍ ഉലമയുടെയും കീഴ്ഘടകങ്ങളുടെയും പരിപാടികളില്‍ നിറസാന്നിധ്യമായിരുന്നു. വാര്‍ധക്യ രോഗങ്ങള്‍ കൂടെയുണ്ടെങ്കിലും അതൊന്നും വകവയ്ക്കാതെ പരിപാടികളില്‍ പങ്കെടുത്തു. സി.എസ്.കെ എന്ന മൂന്നക്ഷരം ചെറിയ ആവേശമൊന്നുമല്ല പ്രവര്‍ത്തകര്‍ക്ക് പകര്‍ന്നുനല്‍കിയത്. നിര്‍ണായക ഘട്ടങ്ങളില്‍ ധീരമായ തീരുമാനം കൊണ്ട് വലിയ പ്രശ്ങ്ങള്‍ ഒന്നുമല്ലാതായത് പ്രവര്‍ത്തകര്‍ ആവേശത്തോടെയാണ് ഓര്‍ക്കുന്നത്.
സമസ്തയുടെ നേതാവായിരിക്കെ തന്നെ മുസ്‌ലിം ലീഗിന്റെയും നേതൃപദവി വഹിച്ചിരുന്നു. കുറ്റ്യാടി മുസ്‌ലിം യതീഖാനയുടെ ഇന്നുള്ള പ്രൗഢമായ വളര്‍ച്ചയ്ക്ക് പിന്നില്‍ തങ്ങളുടെ കഠിനമായ പ്രയത്‌നമായിരുന്നു. മരിക്കുന്നതുവരെ യതീഖാനയുടെ കീഴിലുള്ള സ്ഥാപനങ്ങള്‍, പേരാമ്പ്ര ജബലുന്നൂര്‍ ഇസ്‌ലാമിക് കോംപക്‌സിന് കീഴിലെ സ്ഥാപനങ്ങള്‍ എന്നിവയുടെ പ്രസിഡന്റായിരുന്നു. സൂഫിവര്യനായിരുന്ന പാലേരി അമ്മദ് മുസ്‌ലിയാരുടെ ശിഷ്യനായിരുന്ന തങ്ങള്‍ കര്‍മശാസ്ത്രത്തില്‍ നിപുണനായിരുന്നു.
തങ്ങളുടെ വിയോഗ വാര്‍ത്തയറിഞ്ഞ് നാടിന്റെ വിവിധ ഭാഗങ്ങളില്‍നിന്ന് ജാതിമതഭേദമെന്യേ നിരവധിയാളുകളാണ് പാലേരിയിലെ വീട്ടിലെത്തിയത്. വീട്ടില്‍വച്ച് നടന്ന ആദ്യ ജനാസ നിസ്‌കാരത്തിന് കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി നേതൃത്വം നല്‍കി.
പിന്നീട് പാലേരി പുത്തന്‍പള്ളിയില്‍ ആയിരങ്ങള്‍ പങ്കെടുത്ത നിസ്‌കാരത്തിന് ഖാസി അബ്ദുല്‍ സയ്യിദ് നാസര്‍ ഹയ്യ് ശിഹാബ് തങ്ങളും നേതൃത്വം നല്‍കി. പാലേരി ചാലില്‍ ഖബര്‍സ്ഥാനിലാണു മറവു ചെയ്തത്.