ശാസ്താംകോട്ട: ശാസ്താംകോട്ട ബ്ലോക്ക് പഞ്ചായത്തില്‍ പ്രസിഡന്റ് തെരഞ്ഞെടുപ്പില്‍ സി.പി.എം പ്രതിനിധി യു.ഡി.എഫിന് വോട്ടു ചെയ്തു. ഭരണം യു.ഡി.എഫിന്. മുന്നണി ധാരണ പ്രകാരം സി.പി.ഐ പ്രതിനിധിയായ ബ്ലോക്ക് പഞ്ചായത്ത് പ്രസിഡന്റ് സുമതി ടീച്ചര്‍ രാജി വെച്ചതിനെ തുടര്‍ന്നാണ് തെരഞ്ഞെടുപ്പ് നടന്നത്. ശൂരനാട് ഡിവിഷനിലെ കോണ്‍ഗ്രസ് പ്രതിനിധി അംബികാ ദേവി പിള്ളയെ ബ്ലോക്ക് പഞ്ചായത്ത് പ്രസിഡന്റായി തെരഞ്ഞെടുത്തു. 

എല്‍.ഡി.എഫിന് 8 ഉം യു.ഡി.എഫിന് 6 ഉം സീറ്റുകളായിരുന്നു നിലവിലുണ്ടായിരുന്നത്. നിലവിലെ വൈസ് പ്രസിഡന്റ് സി.പി.എമ്മിലെ ശിവന്‍പിള്ളയാണ് വോട്ട് കോണ്‍ഗ്രസിന് ചെയ്തത്. ഇതോടെ ഇരു മുന്നണികള്‍ക്കും 7 വീതം വോട്ടു ലഭിച്ചു. തുടര്‍ന്ന് നടന്ന നറുക്കെടുപ്പില്‍ അംബികാ ദേവി പിള്ളയ്ക്ക് നറുക്കു വീഴുകയായിരുന്നു. ഐവര്‍കാല ഡിവിഷനിലെ സി.പി.എം പ്രതിനിധി അരുണാ മണിയിയാരുന്നു പ്രസിഡന്റ് സ്ഥാനാര്‍ഥി.

ധാരണ പ്രകാരം ശിവന്‍പിള്ള രാജിവെച്ച് സി.പി.ഐയ്ക്ക് വൈസ് പ്രസിഡന്റ് സ്ഥാനം നല്‍കണമായിരുന്നു. ഇതിനെ തുടര്‍ന്നുള്ള ഭിന്നതയാണ് വോട്ടു മറിക്കാന്‍ കാരണമെന്നാണ് ആരോപണം.