പാലക്കാട്: പ്ലാച്ചിമട അനിശ്ചിതകാല സത്യാഗ്രഹം ഏട്ടാം ദിവസത്തിലേക്ക് കടന്നു. ഏഴാം ദിവസമായ ഇന്നലെ പോരാട്ട നേതാവ് മുണ്ടൂര്‍ രാവുണ്ണി പങ്കെടുത്തു.
പ്ലാച്ചിമട നഷ്ടപരിഹാര ട്രിബ്യൂണല്‍ രൂപീകരിക്കാനുള്ള നടപടികള്‍ സ്വീകരിക്കുക, പ്ലാച്ചിമടയിലെ ഇരകള്‍ക്ക് സര്‍ക്കാര്‍ അടിയന്തിരമായി ഇടക്കാല സാമ്പത്തിക സഹായം അനുവദിക്കുക, പട്ടികജാതി-പട്ടികവര്‍ഗ അതിക്രമം തടയല്‍ നിയമപ്രകാരം കോളകമ്പനി ഉടമകളെ അറസ്റ്റ് ചെയ്യുക, കോളയുടെ ആസ്തികള്‍ കണ്ടുകെട്ടുക, മലിനീകരണ നിയന്ത്രണ ബോര്‍ഡിന്റെ ജലമലിനീകരണം തടയല്‍ നിയമപ്രകാരം കോളകമ്പനിക്കെതിരേ ക്രിമിനല്‍ നടപടികള്‍ സ്വീകരിക്കുക തുടങ്ങിയ ആവശ്യങ്ങള്‍ ഉന്നയിച്ചാണ് കൊക്കകോള വിരുദ്ധ സമര സമിതിയും ഐക്യദാര്‍ഢ്യ സമിതിയും സംയുക്തമായി കലക്ട്രേറ്റിന് മുന്‍പില്‍ അനിശ്ചിതകാല സത്യാഗ്രഹം ആരംഭിച്ചത്.
പ്ലാച്ചിമട കൊക്കകോള വിരുദ്ധ സമരം അതിന്റെ പത്തിനഞ്ചാം വര്‍ഷത്തിലേക്ക് കടക്കുകയാണ് അപ്പോഴും പ്ലാച്ചിമടക്കാര്‍ക്ക് നീതി ലഭിച്ചിട്ടില്ല.
കര്‍ഷക ഏകത സംസ്ഥാന പ്രസിഡന്റ് അഡ്വ. കെ.ജെ ജോസഫ് ഉദ്ഘാടനം ചെയ്തു. ഐക്യദാര്‍ഢ്യ സമിതി ജനറല്‍ കണ്‍വീനര്‍ ആറുമുഖന്‍ പത്തിച്ചിറ അധ്യക്ഷനായി. പോരാട്ടം നേതാവ് മുണ്ടൂര്‍ രാവുണ്ണി, കല്ലൂര്‍ ശ്രീധരന്‍, ടി.കെ കണ്ണന്‍, സി കൃഷ്ണകുമാര്‍, അഖിലേഷ്‌കുമാര്‍, സന്തോഷ് മലമ്പുഴ, പി.കെ രാജന്‍ പങ്കെടുത്തു.