കാസര്‍കോട്: മറ്റൊരു യുവാവുമായി ബന്ധമുണ്ടെന്ന സംശയത്തിന്റെ പേരില്‍ കാമുകിയെ തലക്കടിച്ചു കൊലപ്പെടുത്തിയ കേസില്‍ പൊലിസ് കുറ്റപത്രം സമര്‍പ്പിച്ചു. കര്‍ണാടക ഗദക ശേരുഹട്ടി കമ്മാര്‍ ഓണിയിലെ നാഗപ്പയുടെ ഭാര്യ സരസ്വതി(32)യെ കൊലപ്പെടുത്തിയ കേസില്‍ കാമുകനായിരുന്ന ചന്ദ്രരമേശ് കാംലെ എന്ന സുനിലി(29)നെ പ്രതിയാക്കിയാണ് കുറ്റംപത്രം സമര്‍പ്പിച്ചിരിക്കുന്നത്. കാസര്‍കോട് ഇന്‍സ്‌പെക്ടര്‍ പ്രദീപന്‍ കണ്ണിപ്പൊയിലാണ് ഫസ്റ്റ്ക്ലാസ് മജിസ്‌ട്രേറ്റ് കോടതിയില്‍ കുറ്റപത്രം സമര്‍പ്പിച്ചത്. കര്‍ണാടക ഒബല്‍ഗാവ് കസബാക്ക് സ്വദേശിയാണ് സുനില്‍.
2018 ഡിസംബര്‍ 17നാണ് കേസിനാസ്പദമായ സംഭവം. സരസ്വതിയുമായി ഇയാള്‍ പ്രണയത്തിലാവുകയും വിദ്യാനഗര്‍ ചാലറോഡില്‍ ഒന്നിച്ച് താമസിക്കുകയും ചെയ്തു. സരസ്വതിക്ക് മറ്റൊരു യുവാവുമായി ബന്ധം ഉണ്ടെന്ന സംശയത്തെ തുടര്‍ന്നാണ് കൊലപാതകം നടത്തിയതെന്നാണ് കുറ്റപത്രത്തില്‍ പറയുന്നത്. തലയ്ക്കടിച്ചും ചുമരിലിടിച്ചും കൊലപ്പെടുത്തിയ ശേഷം പ്രതി വീടിന്റെ വാതില്‍ പുറത്തുനിന്നു പൂട്ടി രക്ഷപ്പെടുകയായിരുന്നു. തുടര്‍ന്ന് നടത്തിയ അന്വേഷണത്തിലാണ് സുനില്‍ അറസ്റ്റിലായത്.