വെട്ടത്തൂര്‍: ഗവ.ഹയര്‍ സെക്കന്‍ഡറി സ്‌കൂള്‍ എന്‍.എസ്.എസ് യൂനിറ്റ് കൃഷിത്തോട്ടമൊരുക്കി. ജൈവ കൃഷിയിലൂടെ സ്വന്തമായി വിളവെടുത്ത പച്ചക്കറികള്‍ ഉപയോഗിച്ചാണ് സ്‌കൂളില്‍ വിഭവ സമൃദ്ധ ഉച്ചഭക്ഷണം വിളമ്പുന്നത്. എന്‍.എസ്.എസ് യൂനിറ്റിന്റെ നേതൃത്വത്തില്‍ കഴിഞ്ഞ വര്‍ഷങ്ങളില്‍ സ്‌കൂള്‍ മുറ്റം പച്ചവിരിയിച്ച് നൂറുമേനി വിളവെടുപ്പ് നടത്തിയ വിദ്യാര്‍ഥിക്കൂട്ടം ഇത്തവണ കാടുമൂടിയ പുറമ്പോക്ക് സ്ഥലം വെട്ടിത്തെളിച്ച് മാതൃകാ കൃഷിത്തോട്ടമൊരുക്കി.
അവധി ദിവസങ്ങളിലും ഒഴിവ് സമയങ്ങളിലുമായി വെട്ടത്തൂര്‍ വില്ലേജ് ഓഫിസിന് മുന്‍വശത്തായുള്ള സ്ഥലത്താണ് വിവിധയിനം വാഴകളും ഇടവിളയായി ചേമ്പ്, ചേന എന്നിവയും ഇവര്‍ കൃഷിചെയ്യുന്നത്. വെട്ടത്തൂര്‍ കൃഷിഭവനും അധ്യാപകരും പിന്തുണയ്ക്കുന്നുണ്ട്.