തൃശൂര്‍: കര്‍ക്കിടക മാസാചരണത്തിനു തുടക്കമിട്ട് ഇന്നലെ രാവിലെ തൃശൂര്‍ വടക്കുന്നാഥ ക്ഷേത്രത്തില്‍ നടന്ന ആനയൂട്ടില്‍ 60 ഓളം ആനകള്‍ പങ്കെടുത്തു. ഗജനിരയിലെ ഏറ്റവും ചെറിയ ആനയായ വാരിയത്തു ജയരാജിന് ആദ്യഉരുള നല്‍കി ക്ഷേത്രം മേല്‍ശാന്തി പയ്യപ്പിള്ളി മാധവന്‍ നമ്പൂതിരി ആനയൂട്ടിനു തുടക്കംകുറിച്ചു. കുളിച്ചു കുറിതൊട്ടു ആനച്ചമയങ്ങളില്ലാത്ത കരിവീരച്ചന്തവുമായി തെക്കേഗോപുരനടക്കു സമീപം നിരന്ന ആനകളെ കാണാനും അവയെ ഊട്ടാനും നേരത്തെതന്നെ ആനപ്രേമികളും എത്തിയിരുന്നു. രാവിലെ ഒന്‍പതരയ്ക്കു ആനയൂട്ടു ആരംഭിക്കുമ്പോഴേക്കും വടക്കുന്നാഥ ക്ഷേത്രാങ്കണം ആള്‍ക്കൂട്ടത്തെ കൊണ്ടുനിറഞ്ഞിരുന്നു.

500 കിലോ അരിയുടെ ചോറ് ഉരുളകളാക്കിയാണു ആനകള്‍ക്കു നല്‍കിയത്. ഇതില്‍ ശര്‍ക്കര, മഞ്ഞള്‍പ്പൊടി, നെയ്യ് എന്നിവയും ചേര്‍ത്തു. കൂടാതെ ആനകള്‍ക്ക് പഴം, പൈനാപ്പിള്‍, കക്കരിക്ക, കരിമ്പ്, ചോളം, തണ്ണീര്‍മത്തന്‍ എന്നിവയും കൊടുത്തു.
ആനയൂട്ടിനു മുന്നോടിയായി അഷ്ടദ്രവ്യ മഹാഗണപതി ഹോമവും പുലര്‍ച്ചെ നടത്തി. വടക്കുന്നാഥന്‍ ക്ഷേത്ര ക്ഷേമസമിതിയുടെ നേതൃത്വത്തിലാണു തുടര്‍ച്ചയായി 36ാം വര്‍ഷം ആനയൂട്ടും അഷ്ടദ്രവ്യ മഹാഗണപതി ഹോമവും നടത്തിയത്. ക്ഷേത്രം തന്ത്രി പുലിയന്നൂര്‍ ശങ്കരനാരായണന്‍ നമ്പൂതിരിയുടെ നേതൃത്വത്തില്‍ നടന്ന അഷ്ടദ്രവ്യമഹാഗണപതി ഹോമത്തിനു അമ്പതോളം സഹകാര്‍മികത്വം വഹിച്ചു. അഷ്ടദ്രവ്യങ്ങളായ 10,000 നാളികേരം, 1500 കിലോ ശര്‍ക്കര, 750 കിലോ നെയ്യ്, 200 കിലോ അവില്‍, 250 കിലോ മലര്‍, തേന്‍, എള്ള്, ഗണപതിനാരങ്ങ എന്നീ ദ്രവ്യങ്ങളുപയോഗിച്ചാണ് മഹാഗണപതി ഹോമം തയാറാക്കിയത്. കൊച്ചിന്‍ ദേവസ്വം ബോര്‍ഡിന്റെ സഹകരണത്തോടെയാണ് ആനയൂട്ടും മഹാഗണപതി ഹോമവും നടത്തിയത്.
കൃഷി മന്ത്രി വി. എസ് സുനില്‍കുമാര്‍, കൗണ്‍സിലര്‍ എം എസ് സമ്പൂര്‍ണ, അസിസ്റ്റന്റ് കലക്ടര്‍ രേണുരാജ്, ദേവസ്വം ഭാരവാഹികള്‍ ആനയൂട്ട് കാണാനും ആനകളെ ഊട്ടാനുമെത്തിയിരുന്നു.