കല്‍പ്പറ്റ: കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുടെ സന്ദര്‍ശനത്തിന്റെ ഭാഗമായി ഇന്ന് തിരുനെല്ലി, ബത്തേരി എന്നിവിടങ്ങളില്‍ ഗതാഗത നിയന്ത്രണം ഉണ്ടായിരിക്കുമെന്ന് ജില്ലാ പൊലിസ് മേധാവി അറിയിച്ചു. അപ്പപ്പാറ മുതല്‍ തിരുനെല്ലി വരെ വലിയ വാഹനങ്ങളും മള്‍ട്ടി ആക്‌സല്‍ വാഹനങ്ങളും പ്രവേശിക്കാന്‍ അനുവദിക്കില്ല. പ്രസ്തുത റൂട്ടില്‍ ഇന്ന് രാവിലെ എട്ടു മണി മുതല്‍ വി.വി.ഐ.പി ജില്ല വിട്ടു പോകുന്നത് വരെ യാതൊരുവിധ പാര്‍ക്കിങും അനുവദിക്കില്ല. അതുപോലെ എസ്.എ.എല്‍.പി സ്‌കൂള്‍ പരിസരങ്ങളിലും ഹെലിപാഡിനു സമീപത്തും പാര്‍ക്കിങ് അനുവദിക്കില്ല.
ബത്തേരി കോട്ടക്കുന്ന് ജങ്ഷന്‍ മുതല്‍ കുപ്പാടി ഹൈസ്‌കൂള്‍ ജങ്ഷന്‍ വരെ വലിയ വാഹനങ്ങളും മള്‍ട്ടി ആക്‌സല്‍ വാഹനങ്ങളും പ്രവേശിക്കാന്‍ അനുവദിക്കില്ല. പ്രസ്തുത റൂട്ടില്‍ പാര്‍ക്കിങും അനുവദിക്കുന്നതല്ല. സെന്റ് മേരീസ് കോളജ് ഗ്രൗണ്ട് പരിസരങ്ങളിലും ഹെലിപാഡിനു സമീപത്തും ഇന്നലെ രാത്രി മുതല്‍ തന്നെ പാര്‍ക്കിങിന് നിരോധനമേര്‍പ്പെടുത്തിയിട്ടുണ്ട്. ബത്തേരി ടൗണ്‍ ഭാഗത്ത് നിന്നും പ്രവര്‍ത്തകരെയും കൊണ്ട് വരുന്ന വാഹനങ്ങള്‍ കടമാന്‍ചിറ റോഡ് ജങ്ഷനില്‍ പ്രവര്‍ത്തകരെ ഇറക്കി കുപ്പാടി റോഡ് വഴി വാഹനങ്ങള്‍ കടമാന്‍ചിറ ഗ്രൗണ്ടില്‍ പാര്‍ക്ക് ചെയ്യണം. പുല്‍പ്പള്ളി ഭാഗത്ത് നിന്നും പ്രവര്‍ത്തകരെ കൊണ്ട് വരുന്ന വാഹനങ്ങള്‍ ഫോറസ്റ്റ് ഓഫിസിനു സമീപം ആളുകളെ ഇറക്കി വാഹനങ്ങള്‍ ഫോറസ്റ്റ് ഓഫിസിനു സമീപത്തുള്ള ചെറിയ ഗ്രൗണ്ടിലും പാര്‍ക്കിങ് ഏരിയകളിലുമായി പാര്‍ക്ക് ചെയ്യണം.