പെരിന്തല്‍മണ്ണ: അമ്മിനിക്കാട് അത്തിക്കലിന്‍ സൗജന്യ കുടിവെള്ള വിതരണത്തിനെത്തിയ വാഹനം സി.പി.എം പ്രവര്‍ത്തകര്‍ തടഞ്ഞു. സംഭവം അന്വേഷിക്കാനെത്തിയ താഴെക്കോട് പഞ്ചായത്ത് വിദ്യഭ്യാസ ആരോഗ്യ സ്ഥിര സമിതി അധ്യക്ഷനും രണ്ടാം വാര്‍ഡ് അത്തിക്കലിലെ മെമ്പറുമായ എ.കെ ഹംസ മാസ്റ്ററെ(44) ഗുണ്ടകള്‍ മര്‍ദ്ദിച്ച് പരുക്കേല്‍പ്പിക്കുകയും ചെയ്തു. മുസ്‌ലിംലീഗിന് കീഴിലുള്ള മിറാക്കിള്‍ ക്ലബിന്റെ പ്രവര്‍ത്തകരാണ് കഴിഞ്ഞ ഒന്നരമാസമായി ഇവിടെ കുടിവെള്ള വിതരണം നടത്തുന്നത്.
കനത്ത കുടിവെള്ള ക്ഷാമം നേരിടുന്ന ഇവിടെ എസ്.സി, എസ്.ടി കോളനികളടക്കമുള്ളവര്‍ക്ക് ഏറെ ആശ്വാസകരമായിരുന്നു സൗജന്യമായി മിനി ലോറികളിലെത്തിക്കുന്ന കുടിവെള്ള വിതരണം. ഹംസ മാസ്റ്ററുടെ ചെവിക്ക് സാരമായി പരുക്കേറ്റതിനെ തുടര്‍ന്ന് പെരിന്തല്‍മണ്ണ സ്വകാര്യ ആശുപത്രിയില്‍ പ്രവേശിപ്പിച്ചു. സംഭവത്തില്‍ മുരിങ്ങാക്കോടന്‍ അലി, ലുഖ്മാന്‍, ചോലമുഖത്ത് ഷാഹിദ് എന്നിവര്‍ക്കെതിരേ പെരിന്തല്‍മണ്ണ പൊലിസ് കേസെടുത്തു. പ്രതികള്‍ പ്രദേശത്തെ സ്ഥിരം പ്രശ്‌നക്കാരാണെന്ന് നാട്ടുകാര്‍ പറഞ്ഞു.