കൊളത്തൂര്‍: റോഡരികിലെ ട്രാന്‍സ്‌ഫോര്‍മറിനു ചുവട്ടില്‍ തീപടര്‍ന്നത് ശ്രദ്ധയില്‍പ്പെട്ട മത്സ്യക്കച്ചവടക്കാരനായ യുവാവിന്റെ ഇടപെടല്‍ അപകടമൊഴിവാക്കി. കൊളത്തൂര്‍ കല്ലിരട്ടി റോഡില്‍ തെക്കേകരയില്‍ ഇന്നലെ പകല്‍ പന്ത്രണ്ടോടെയാണ് സംഭവം.
കൊളത്തൂര്‍ പാറമ്മലങ്ങാടി സ്വദേശി പൈങ്ങീരി മുഹമ്മദ് സഫ്‌വാന്‍ (22) ആണ് ഇരുചക്രവാഹനത്തില്‍ മത്സ്യവില്‍പന നടത്തുന്നതിനിടെ ട്രാന്‍സ്‌ഫോര്‍മറിനു ചുവട്ടില്‍ തീപടരുന്നതായി കണ്ടത്. കൊളത്തൂര്‍ ഇലക്ട്രിക്കല്‍ സെക്ഷന്റെ കീഴിലുള്ളതാണ് ട്രാന്‍സ്‌ഫോര്‍മര്‍.
ഉടന്‍ കെ.എസ്.ഇ.ബി അധികൃതരെ യുവാവ് വിവരമറിയിച്ച് വൈദ്യുതിബന്ധം വിച്ചേദിച്ച് തീ അണച്ചതിനാല്‍ വലിയ ദുരന്തം ഒഴിവായി.
ഉണങ്ങിനിന്നിരുന്ന പുല്ലിനാണ് തീ പിടിച്ചത്. ആളിപ്പടര്‍ന്ന തീ ട്രാര്‍സ്‌ഫോര്‍മറിലേക്ക് പടരുന്നത് സഫ്‌വാന്റെ ഇടപെടല്‍മൂലം ഒഴിവാകുകയായിരുന്നു.ട്രാന്‍സ്‌ഫോര്‍മറിലെ ഫ്യൂസില്‍നിന്ന് തീപ്പൊരി വീണതാണ് തീപ്പിടിക്കാന്‍ കാരണമെന്ന് കരുതുന്നു.