കൊണ്ടോട്ടി: കരിപ്പൂരില്‍ 18 പേരുടെ മരണത്തിനിടയാക്കിയ എയര്‍ ഇന്ത്യ എക്‌സ്പ്രസ് വിമാന അപകടത്തിന് കാരണമായത് പ്രതികൂല കാലാവസ്ഥയും യന്ത്രത്തകരാറും. 

മഴയും വിമാനത്തിന്റെ മുന്‍ ലാന്റിങ് ചക്രങ്ങള്‍ ചലിക്കാതായതുമാണ് വിമാനം താഴ്ചയിലേക്ക് കൂപ്പുകുത്താന്‍ ഇടയാക്കിയതെന്നാണ് ഡി.ജി.സി.എയും എയര്‍ ഇന്ത്യയും നടത്തിയ പ്രാഥമിക പരിശോധനയില്‍ കണ്ടെത്തിയത്.പതിവുവിമാനങ്ങളില്ലാത്ത കരിപ്പൂരില്‍ മഴയിലും ശ്രദ്ധയോടെ ലാന്‍ഡ് ചെയ്യാനാണ് എയര്‍ ട്രാഫിക് കണ്‍ട്രോള്‍ പൈലറ്റിന് നിര്‍ദ്ദേശം നല്‍കിയത്. എന്നാല്‍ വിമാനം മൂന്നു തവണ ആകാശത്ത് വട്ടമിട്ടു പറന്ന ശേഷമാണ് റണ്‍വേയുടെ കിഴക്കുഭാഗത്ത് ആദ്യം ലാന്‍ഡിങിന് ശ്രമിച്ചത്.

3800 അടിയോളം താഴ്ന്നു വന്നതിനുശേഷം നടത്തിയ ലാന്‍ഡിങ്ങ് വിഫലമായതോടെ വിമാനം വീണ്ടും പറന്നുയരുകയും ചെയ്തു. തുടര്‍ന്നാണ് പടിഞ്ഞാറുഭാഗത്തുനിന്നു (റണ്‍വേ 10 )ലാന്‍ഡ് ചെയ്യാന്‍ പൈലറ്റ് തയാറായത്.

ടെച്ച് ലൈനില്‍നിന്നു 4,200 അടി കടന്നാണ് വിമാനം റണ്‍വേ തൊട്ടത്. റണ്‍വേ പാതിയിലേറെയും പിന്നിട്ട വിമാനം മുന്നോട്ടുപാഞ്ഞതോടെ നിയന്ത്രിക്കാന്‍ പൈലറ്റിന് സാധിച്ചില്ല. മഴമൂലം റണ്‍വേയിലെ വെള്ളക്കെട്ടുണ്ടായതും തിരിച്ചടിയായി. 

ഇതിനിടെ വിമാനത്തിന്റെ മുന്‍ ചക്രങ്ങളും പ്രവര്‍ത്തനരഹിതമായി. വിമാനത്തിന്റെ മുന്‍ ചക്രങ്ങള്‍ക്കിടയിലുള്ള ഭാഗം റണ്‍വേയില്‍ ഉരഞ്ഞതിന്റെ പാടുകള്‍ ഇന്നലെ നടത്തിയ പരിശോധനയില്‍ അധികൃതര്‍ കണ്ടെത്തി.