വളാഞ്ചേരി: പിഴയടയ്ക്കാന്‍ പോക്കറ്റില്‍ പണം തികയാത്തതിനാല്‍ എയര്‍പോര്‍ട്ടില്‍ നിന്ന് ഷാഫി മടങ്ങിയത് ജീവിതത്തിലേക്ക്. വളാഞ്ചേരി മൂന്നാക്കല്‍ സ്വദേശി തങ്ങളകത്ത് മുഹമ്മദ് ഷാഫി അപകടത്തില്‍പെട്ട വിമാനത്തില്‍ ടിക്കറ്റെടുത്തിരുന്നുവെങ്കിലും യാത്ര മുടങ്ങിയതിന് നാഥനോട് നന്ദി പറയുകയാണ്. 

 

കഴിഞ്ഞ 27നാണ് ഷാഫി എയര്‍ഇന്ത്യ എക്‌സ്പ്രസ് വിമാനത്തിന് നാട്ടിലേക്ക് ടിക്കറ്റ് എടുത്തത്. യാത്രക്കായി എയര്‍പോര്‍ട്ടിലെത്തുകയും ചെയ്തു. വിസയുമായി ബന്ധപ്പെട്ട പിഴയടക്കാതെ യാത്ര സാധ്യമല്ലെന്ന് അധികൃതര്‍ അറിയിച്ചു. ഇല്ലെങ്കില്‍ ജി.സി.സിയിലേക്കുള്ള ആജീവനാന്ത വിലക്കോടെ യാത്ര ചെയ്യാമെന്ന ഉപാധി വിമാനത്താവള അധികൃതര്‍ മുന്നോട്ടുവെച്ചു. 

 

അതു നിഷേധിച്ച് പിന്നീട് ഫൈന്‍ അടച്ച് യാത്ര ചെയ്യാമെന്നറിയിച്ച് മടങ്ങുകയായിരുന്നുവെന്ന് ഷാഫി 'സുപ്രഭാത'ത്തോട് പറഞ്ഞു. ഒക്ടോബറിലാണ് അവസാനമായി നാട്ടില്‍ വന്ന് മടങ്ങിയത്. അടുത്ത ദിവസം തന്നെ നാട്ടിലേക്ക് വരാനുള്ള തയാറെടുപ്പിലാണ് ഷാഫി.