തൃശൂര്‍: പാലക്കാട് ഗവ.എന്‍ജിനീയറിങ് കോളജ് സൈക്ലിങ് ക്ലബിന്റെ നേതൃത്വത്തില്‍ സ്വീപ്പ് കേരള ഘടകത്തിന്റെ സഹകരണത്തോടെ നടത്തുന്ന 'എന്റെ വോട്ട് എന്റെ ശക്തി' ഓള്‍ കേരള സൈക്കിള്‍ റൈഡിന് ജില്ലാ കലക്ടറേറ്റില്‍ ജില്ലാ തെരഞ്ഞെടുപ്പ് ഓഫിസറായ ജില്ലാ കലക്ടര്‍ ടി.വി അനുപമയുടെ നേതൃത്വത്തില്‍ സ്വീകരണം നല്‍കി.
എല്ലാ പൗരന്മാരും വോട്ടവകാശം വിനിയോഗിക്കുക, കരുത്തുറ്റ ജനാധിപത്യത്തിന് വിപുലമായ ജനപങ്കാളിത്തം ഉറപ്പ് വരുത്തുക, യുവാക്കളെ വോട്ട് ചെയ്യാന്‍ പ്രേരിപ്പിക്കുക, ഹരിത പെരുമാറ്റച്ചട്ട തെരഞ്ഞെടുപ്പ് പ്രോത്സാഹിപ്പിക്കുക എന്നീ ലക്ഷ്യത്തോടെ നടത്തുന്ന സൈക്കിള്‍ റൈഡ് ഏപ്രില്‍ 13ന് കാസര്‍കോട് നിന്നാണ് ആരംഭിച്ചത്.
സൈക്കിള്‍ റൈഡ് എട്ട് ദിവസം കൊണ്ട് 10 ജില്ലകളിലൂടെ സഞ്ചരിച്ച് തിരുവനന്തപുരത്ത് സമാപിക്കും.
ഒരു ദിവസം 90 കിലോ മീറ്ററോളമാണ് സൈക്കിള്‍ യാത്ര. വിദ്യാര്‍ഥികളായ ജസീല്‍, സാബിന്‍, ജുനൈദ്, സലാഹ്, അദ്‌നാന്‍, ജിബിന്‍ എന്നിവരാണ് സൈക്കിള്‍ റൈഡില്‍ പങ്കെടുക്കുന്നത്.