തിരുവനന്തപുരം: പതിനൊന്നാമത് മലയാറ്റൂര്‍ പുരസ്‌കാരത്തിന് ടി.ഡി രാമകൃഷ്ണന്റെ 'സുഗന്ധി എന്ന ആണ്ടാള്‍ ദേവനായകി' എന്ന നോവലിനെ തെരഞ്ഞെടുത്തു. 15,000 രൂപയും ശില്‍പവും പ്രശസ്തിപത്രവും അടങ്ങുന്നതാണ് പുരസ്‌കാരം. നവാഗത എഴുത്തുകാര്‍ക്കുള്ള മലയാറ്റൂര്‍ പ്രൈസ് ലോപയുടെ 'വൈക്കോല്‍പാവ' എന്ന സമാഹാരത്തിന് ലഭിച്ചു. 5,001 രൂപയും പ്രശസ്തിപത്രവും അടങ്ങുന്നതാണ് പുരസ്‌കാരം.  കെ.ജയകുമാര്‍ ഐ.എ.എസ് ചെയര്‍മാനും ഡോ.ഡി.ബെഞ്ചമിന്‍, ഡോ.വി.കെ ജയകുമാര്‍ എന്നിവര്‍ അംഗങ്ങളുമായ കമ്മിറ്റിയാണ് അവാര്‍ഡ് കൃതികള്‍ തെരഞ്ഞെടുത്തത്. ഓഗസ്റ്റ് രണ്ടാംവാരം തിരുവനന്തപുരത്ത് നടക്കുന്ന ചടങ്ങില്‍ പുരസ്‌കാരം സമ്മാനിക്കും.