കോട്ടത്തറ: പുഴക്കം വയല്‍ ഹുജ്ജത്തുല്‍ ഇസ്‌ലാം മദ്‌റസയുടെ പുനര്‍നിര്‍മാണം ആരംഭിച്ചു. 1966ല്‍ നിര്‍മിച്ച മദ്‌റസാ കെട്ടിടം ജീര്‍ണാവസ്ഥയിലായതോടെയാണ് പുതിയ കെട്ടിടം നിര്‍മാണം തുടങ്ങിയത്. പാണക്കാട് ഹമീദലി ശിഹാബ് തങ്ങള്‍ മുഖ്യ രക്ഷാധികാരിയും സമസ്ത ജില്ലാ പ്രസിഡന്റ് കെ.ടി ഹംസ മുസ്‌ലിയാര്‍, സമസ്ത കേന്ദ്ര മുശാവറയംഗം വി മൂസക്കോയ മുസ്‌ലിയാര്‍, എം.എ മുഹമ്മദ് ജമാല്‍ എന്നിവര്‍ രക്ഷാധികാരികളായുമുള്ള കമ്മിറ്റിയാണ് പ്രവൃത്തികള്‍ക്ക് നേതൃത്വം നല്‍കുന്നത്.
പ്രവൃത്തികളില്‍ നാട്ടുകാരുടേയും ആദിവാസി വിഭാഗങ്ങളുടെ അടക്കം സജീവ സാന്നിധ്യവുമുണ്ട്. 45 ലക്ഷം രൂപ ചെലവു പ്രതീക്ഷിക്കുന്ന 5400 സ്‌ക്വയര്‍ ഫീറ്റുള്ള കെട്ടിടമാണ് നിര്‍മിക്കുന്നത്. ഹയര്‍ സെക്കന്‍ഡറി മദ്‌റസയും കൂടെ ഭൗതിക വിദ്യാഭ്യാസ സംവിധാനങ്ങളും ഒരുക്കാനാണ് പദ്ധതി. മദ്‌റസയുടെ നിര്‍മാണ പ്രവൃത്തി പൂര്‍ത്തീകരണത്തിന് ഉദാരമതികളുടെ സഹായം പ്രതീക്ഷിച്ചിരിക്കുകയാണ് മഹല്ലുകാര്‍.
മെയിന്‍ സ്ലാബ് കോണ്‍ഗ്രീറ്റിന് തുടക്കം കുറിച്ചുള്ള പ്രാര്‍ഥനക്ക് ശിഹാബുദ്ദീന്‍ ഇമ്പിച്ചിക്കോയ തങ്ങള്‍ നേതൃത്വം നല്‍കി. ഖത്തീബ് ജംഷീര്‍ വാഫി വിളമ്പുകണ്ടം, പ്രസിഡന്റ് പി മമ്മു, സെക്രട്ടറി എം.കെ ഹസന്‍, നിര്‍മാണ കമ്മിറ്റി ചെയര്‍മാന്‍ പി അന്ത്രു, കണ്‍വീനര്‍ പി.സി കോട്ടത്തറ, എം കുഞ്ഞബ്ദുല്ല, വി ആലി, പി.കെ സലീം, പി.ടി അഷ്‌കര്‍, വി ഷൗകത്ത്, കെ.കെ മജീദ്, പി മജീദ്, കെ.കെ പോക്കര്‍, അസീസ് പൂളക്ക, പി ഫൈസല്‍, പുറക്ക മജീദ്, കെ ഷംസുദ്ദീന്‍, പി ഹസ്സന്‍ നേതൃത്വം നല്‍കി.