കണ്ണൂര്‍: ഉത്തരേന്ത്യന്‍ രാഷ്ട്രീയത്തെ അപേക്ഷിച്ച് ചര്‍ച്ചകളും സംവാദങ്ങളും നടക്കുന്നുവെന്നതാണു കേരളത്തിനെ വ്യത്യസ്തമാക്കുന്നതെന്നു കോണ്‍ഗ്രസ് ദേശീയ അധ്യക്ഷന്‍ രാഹുല്‍ ഗാന്ധി. ഇതു രാഷ്ട്രീയത്തിനു മാതൃകയാണെന്നും അദ്ദേഹം പറഞ്ഞു. കാസര്‍കോട്, കണ്ണൂര്‍, വടകര ലോക്‌സഭാ മണ്ഡലങ്ങളിലെ നേതാക്കളെ പങ്കെടുപ്പിച്ച് നടത്തിയ യു.ഡി.എഫ് നേതൃയോഗത്തില്‍ സംസാരിക്കുകയായിരുന്നു രാഹുല്‍. യു.ഡി.എഫ് പ്രവര്‍ത്തകര്‍ ഇവിടെ പൊരുതുന്നതു ബലം പ്രയോഗിക്കുന്ന എതിരാളികളോടാണ്. എന്നാല്‍ കോണ്‍ഗ്രസ് അക്രമത്തില്‍ വിശ്വസിക്കുന്നില്ല. വെറുപ്പിനോടുള്ള നമ്മുടെ പോരാട്ടം സ്‌നേഹം കൊണ്ടാണ്. കേരളത്തിലെ നേതാക്കളുടെയും പ്രവര്‍ത്തകരുടെയും ത്യാഗനിര്‍ഭര പ്രവര്‍ത്തനത്തെ താന്‍ ബഹുമാനിക്കുന്നുവെന്നും രാഹുല്‍ ഗാന്ധി പറഞ്ഞു. ഇന്ത്യയെന്നാല്‍ ഏകശിലാ ഘടനയുള്ള ഒരു ആശയമല്ല, ഒരുപാട് ആശയങ്ങളുടെ കൂടിച്ചേരലാണ്. ബി.ജെ.പി ഉദ്ദേശിക്കുന്നത് ഇന്ത്യയെന്നാല്‍ ഏക ആശയമാണ്. അതു നാഗ്പൂര്‍ നിയന്ത്രണമുള്ളതാവണമെന്നാണ് അവര്‍ ആഗ്രഹിക്കുന്നത്. ജനങ്ങളാണ് ഇന്ത്യയെ നിയന്ത്രിക്കേണ്ടത്. അതുകൊണ്ടാണ് താന്‍ കേരളത്തിലും മത്സരിക്കാന്‍ തീരുമാനിച്ചത്. യു.പി.എക്കും കോണ്‍ഗ്രസിനും ആത്മവിശ്വാസം പകരുന്ന തെരഞ്ഞെടുപ്പാണിതെന്നും രാഹുല്‍ വ്യക്തമാക്കി. കെ.പി.സി.സി അധ്യക്ഷന്‍ മുല്ലപ്പള്ളി രാമചന്ദ്രന്‍ അധ്യക്ഷനായി. മുന്‍ മുഖ്യമന്ത്രി ഉമ്മന്‍ചാണ്ടി, എ.ഐ.സി.സി ജനറല്‍ സെക്രട്ടറി കെ.സി വേണുഗോപാല്‍, യു.ഡി.എഫ് സ്ഥാനാര്‍ഥികളായ കെ. സുധാകരന്‍, രാജ്‌മോഹന്‍ ഉണ്ണിത്താന്‍, ഡി.സി.സി അധ്യക്ഷന്‍ സതീശന്‍ പാച്ചേനി സംസാരിച്ചു.എ.ഐ.സി.സി ജനറല്‍ സെക്രട്ടറി മുകുള്‍ വാസ്‌നിക്, എം.എല്‍.എമാരായ കെ.സി ജോസഫ്, സണ്ണി ജോസഫ്, കെ.എം ഷാജി, മുസ്‌ലിം ലീഗ് സംസ്ഥാന വൈസ് പ്രസിഡന്റ് വി.കെ അബ്ദുല്‍ ഖാദര്‍ മൗലവി, കേരളാ കോണ്‍ഗ്രസ് സംസ്ഥാന ജനറല്‍ സെക്രട്ടറി പി.ടി ജോസ്, കാസര്‍കോട് ഡി.സി.സി പ്രസിഡന്റ് ഹക്കീം കുന്നില്‍, പി. രാമകൃഷ്ണന്‍, വി.എ നാരായണന്‍, സുമാ ബാലകൃഷ്ണന്‍, കെ.പി കുഞ്ഞിക്കണ്ണന്‍, പി.എം സുരേഷ് ബാബു, ഐ.എന്‍.ടി.യു.സി ദേശീയ സെക്രട്ടറി കെ. സുരേന്ദ്രന്‍, പ്രൊഫ. എ.ഡി മുസ്തഫ പങ്കെടുത്തു.