തിരുവനന്തപുരം: സംസ്ഥാനത്തെ കൊവിഡ് വ്യാപനത്തിന്റെ തീവ്രത വ്യക്തമാക്കി ലാര്‍ജ് കമ്മ്യൂണിറ്റി ക്ലസ്റ്ററുകളുടെ എണ്ണത്തില്‍ വര്‍ധനവ്. ആകെ 28 ലാര്‍ജ് കമ്മ്യൂണിറ്റി ക്ലസ്റ്ററുകള്‍ സംസ്ഥാനത്തുണ്ടെന്ന് കഴിഞ്ഞ ദിവസം ആരോഗ്യവകുപ്പ് പുറത്തുവിട്ട റിപ്പോര്‍ട്ടില്‍ വ്യക്തമാക്കുന്നു. ഒരു തദ്ദേശസ്ഥാപന പരിധിയില്‍ അന്‍പതിലധികം സമ്പര്‍ക്ക കേസുകള്‍ റിപ്പോര്‍ട്ട് ചെയ്യുമ്പോഴാണ് അവിടം ലാര്‍ജ് കമ്മ്യൂണിറ്റി ക്ലസ്റ്ററായി പരിഗണിക്കുന്നത്. കഴിഞ്ഞമാസം പത്ത് ലാര്‍ജ് ക്ലസ്റ്ററുകള്‍ മാത്രമായിരുന്നു ഉണ്ടായിരുന്നത്.
കൊവിഡ് വ്യാപനം രൂക്ഷമായ തിരുവനന്തപുരത്ത് പത്ത് ലാര്‍ജ് കമ്മ്യൂണിറ്റി ക്ലസ്റ്ററുകളാണ് ഉള്ളത്. കൊല്ലത്ത് ഏഴ്, കാസര്‍കോട് മൂന്ന്, ആലപ്പുഴയിലും എറണാകുളത്തും രണ്ട്, പത്തനംതിട്ട, പാലക്കാട്, മലപ്പുറം, കോഴിക്കോട് ജില്ലകളില്‍ ഒന്നു വീതം എന്നിങ്ങനെയാണു മറ്റു ജില്ലകളിലെ എണ്ണം. ഇതിനു പുറമെ സംസ്ഥാനത്ത് 75 ലിമിറ്റഡ് കമ്മ്യൂണിറ്റി ക്ലസ്റ്ററുകളും 18 ക്ലോസ്ഡ് കമ്മ്യൂണിറ്റി ക്ലസ്റ്ററുകളുമുണ്ട്.