സ്വന്തം ലേഖകന്‍
തിരുവനന്തപുരം: കൊവിഡ് പ്രതിരോധത്തിനു സമഗ്ര പദ്ധതികളുമായി സംസ്ഥാന പൊലിസ്. റോഡിലും വ്യാപാര സ്ഥാപനങ്ങളിലും ആള്‍ക്കൂട്ടം അനുവദിക്കില്ലെന്നും ഇക്കാര്യത്തില്‍ കര്‍ശന നിയന്ത്രണം ഏര്‍പ്പെടുത്തണമെന്നും ഡി.ജി.പി വിളിച്ചുചേര്‍ത്ത അവലോകന യോഗത്തില്‍ തീരുമാനമായി. നിരത്തുകളിലെ പരിശോധനകള്‍ക്ക് ഡിവൈ.എസ്.പിമാര്‍ നേരിട്ട് നേതൃത്വം നല്‍കും. വ്യാപാര സ്ഥാപനങ്ങളിലും പരിശോധന കര്‍ശനമാക്കും. നിലവിലെ പ്രവര്‍ത്തനശൈലി മാറ്റണമെന്ന് ഒരു വിഭാഗം ഉദ്യോഗസ്ഥര്‍ അഭിപ്രായപ്പെട്ടു.
രോഗവ്യാപനം കൂടിയ സാഹചര്യത്തില്‍ കൊവിഡ് ട്രെയ്‌സിങ് പ്രായോഗികമല്ലെന്നും അഭിപ്രായം ഉയര്‍ന്നു. റസിഡന്റ്‌സ് അസോസിയേഷന്‍, മറ്റു സംഘടനകള്‍ എന്നിവയുമായി സഹകരിച്ച് പുതിയ സംവിധാനം കൊണ്ടുവരണമെന്നും ഉദ്യോഗസ്ഥര്‍ ആവശ്യപ്പെട്ടു. സമ്പര്‍ക്കപ്പട്ടിക തയാറാക്കലും കണ്ടെയ്ന്‍മെന്റ് സോണുകളുടെ നിയന്ത്രണവും പൊലിസിന്റെ മേല്‍നോട്ടത്തില്‍ തുടരും. ആരോഗ്യവകുപ്പുമായി ആശയവിനിമയം നടത്തി വേണം സമ്പര്‍ക്കപ്പട്ടിക തയാറാക്കാനെന്നും പ്രാദേശികമായി കടുത്ത നിയന്ത്രണങ്ങള്‍ ഏര്‍പ്പെടുത്താന്‍ കലക്ടറുമായി കൂടിയാലോചിക്കാനും എല്ലാ എസ്.പിമാര്‍ക്കും നിര്‍ദേശം നല്‍കി. എസ്.പിമാര്‍ മുതല്‍ ഉന്നത ഉദ്യോസ്ഥര്‍ വരെ യോഗത്തില്‍ പങ്കെടുത്തു.
അതേസമയം, കൊവിഡ് പ്രതിരോധ ചുമതല പൊലിസിനെ ഏല്‍പ്പിച്ച് ദിവസങ്ങള്‍ പിന്നിട്ടിട്ടും ആശയക്കുഴപ്പം നിലനില്‍ക്കുകയാണ്. സമ്പര്‍ക്കപ്പട്ടിക തയാറാക്കാനുള്ള ചുമതല ആരോഗ്യപ്രവര്‍ത്തകരില്‍നിന്ന് മാറ്റി പൊലിസുകാരെ ഏല്‍പ്പിച്ച് ദിവസങ്ങള്‍ കഴിഞ്ഞിട്ടും പലകാര്യങ്ങളിലും അവ്യക്തതയുണ്ട്. എല്ലായിടത്തും പൊലിസ് നേരിട്ട് ഇപ്പോഴും പട്ടിക തയാറാക്കുന്നില്ല. ചില സ്ഥലത്ത് ബൈക്ക് പട്രോള്‍ സംഘമെത്തി പട്ടിക തയാറാക്കുകയാണ്. ചിലയിടങ്ങളില്‍ ഹെല്‍ത്ത് ഇന്‍സ്‌പെക്ടര്‍മാര്‍ തയാറാക്കുന്ന പട്ടിക മെഡിക്കല്‍ ഓഫിസര്‍മാരില്‍നിന്ന് പൊലിസ് ശേഖരിക്കുകയും ചെയ്യുന്നു. ഇതില്‍ ഹെല്‍ത്ത് ഇന്‍സ്‌പെക്ടര്‍മാര്‍ക്ക് അതൃപ്തിയുണ്ട്.
നിലവില്‍ പൊലിസിനു ചുമതല നല്‍കിയിരിക്കെ തങ്ങളുടെ പുതിയ ചുമതല വ്യക്തമാക്കണമെന്ന് 4,700ഓളം വരുന്ന സംസ്ഥാനത്തെ ഹെല്‍ത്ത് ഇന്‍സ്‌പെക്ടര്‍മാര്‍ സര്‍ക്കാരിനോട് ആശ്യപ്പെട്ടിട്ട് രണ്ടു ദിവസമായി.