ലഖ്‌നോ: രണ്ടാംഘട്ട വോട്ടെടുപ്പ് നടന്ന ഇന്നലെ പാര്‍ട്ടിയുടെ ചിഹ്നം പതിച്ച ഷാളും തോളിലിട്ട് പോളിങ് ബൂത്തിലേക്ക് ഇടിച്ചുകയറിയ ബി.ജെ.പി സിറ്റിങ് എം.പിയെ വീട്ടുതടങ്കലിലാക്കി. ഉത്തര്‍പ്രദേശിലെ ബുലന്ദ്ശഹര്‍ മണ്ഡലത്തിലെ ബി.ജെ.പി എം.പി ഭോലാ സിങ് ആണ് പാര്‍ട്ടിയുടെ ചിഹ്നം പതിച്ച ഷാളും തോളിലിട്ട് പോളിങ് ബൂത്തിലേക്കു എത്തിയത്. ബൂത്തിലെ സുരക്ഷാ ഉദ്യോഗസ്ഥരെ അവഗണിച്ചാണ് അദ്ദേഹം ഉള്ളില്‍ കടന്നത്. കോണ്‍ഗ്രസ്സിന്റെയും എസ്.പി - ബി.എസ്.പി നേതൃത്വത്തിലുള്ള മഹാസഖ്യത്തിന്റെയും ബൂത്ത് ഏജന്റുമാര്‍ നല്‍കിയ പരാതി പരിഗണിച്ച് ജില്ലാ ഭരണകൂടം ഇദ്ദേഹത്തെ വീട്ടുതടങ്കലിലേക്കു മാറ്റാന്‍ ഉത്തരവിടുകയായിരുന്നു.
ഇതേതുടര്‍ന്ന് സുരക്ഷാ ഉദ്യോഗസ്ഥര്‍ അദ്ദേഹത്തെ വീട്ടിലേക്കു കൊണ്ടുപോയി. പോളിങ് അവസാനിക്കുന്നത് വരെ വീട്ടില്‍ കഴിയാനാണ് ജില്ലാ ഭരണകൂടം അദ്ദേഹത്തിനു നിര്‍ദേശം നല്‍കിയത്.

ബൂത്തിലേക്ക് എത്തിയ ഇദ്ദേഹത്തെ ആദ്യം സുരക്ഷാ ഉദ്യോഗസ്ഥര്‍ തടയുകയായിരുന്നു. പിന്നീട് ഇദ്ദേഹം ജില്ലാ മജിസ്‌ട്രേറ്റിനെ ഫോണില്‍ വിളിക്കുകയും ഫോണ്‍ സുരക്ഷാ ഉദ്യോഗസ്ഥനു കൈമാറുകയും തുടര്‍ന്ന് സുരക്ഷാ ഉദ്യോഗസ്ഥന്‍ മജിസ്‌ട്രേറ്റുമായി സംസാരിക്കുന്നതും വിഡിയോ ദൃശ്യങ്ങളില്‍ കാണാം.
ജില്ലാ മജിസ്‌ട്രേറ്റ് ആണ് ഇദ്ദേഹത്തിന് ബൂത്തിനുള്ളില്‍ പ്രവേശിക്കാന്‍ അനുമതി നല്‍കിയതെന്നാണ് റിപ്പോര്‍ട്ട്. എന്നാല്‍, വിഡിയോ ദൃശ്യങ്ങള്‍ മാധ്യമങ്ങളില്‍ പ്രചരിക്കുകയും എതിര്‍സ്ഥാനാര്‍ത്ഥികളുടെ ബൂത്ത് ഏജന്റുമാരുടെ പരാതി വരികയും ചെയ്തതോടെ ജില്ലാ മജിസ്‌ട്രേറ്റ് വിഷയം ഗൗരവമായി എടുക്കുകയായിരുന്നു. എം.പിയുടെ നടപടി പെരുമാറ്റച്ചട്ട ലംഘനമാണെന്ന് ജില്ലാ ഭരണകൂടം അറിയിച്ചു.
ഉത്തര്‍പ്രദേശില്‍ ഇന്നലെ വോട്ടെടുപ്പ് നടക്കുന്ന എട്ട് മണ്ഡലങ്ങളില്‍ ഒന്നാണ് ബുലന്ദ്ശഹര്‍. 2014ലെ തെരഞ്ഞെടുപ്പില്‍ 4,21,973 വോട്ടുകളുടെ ഭൂരിപക്ഷത്തിനാണ് ബി.എസ്.പി സ്ഥാനാര്‍ഥി പ്രദീപ് കുമാര്‍ ജാദവിനെ ഭോലാ സിങ് പരാജയപ്പെടുത്തിയത്.