മോദി വ്യാജ പിന്നാക്കക്കാരനെന്ന് മായാവതി

ന്യൂഡല്‍ഹി: 24 കൊല്ലത്തിന് ശേഷം വേദി പങ്കിട്ട്, ഉത്തര്‍പ്രദേശിലെ മെയിന്‍പുരിയെ ഇളക്കി മറിച്ച് മുലായവും മായാവതിയും. ഉത്തര്‍പ്രദേശ് രാഷ്ട്രീയത്തിലെ അതികായരുടെ രണ്ടര പതിറ്റാണ്ട് നീണ്ട ശത്രുതയ്ക്കാണ് ഇതോടെ അന്ത്യമായത്. ഉത്തര്‍പ്രദേശിലെ മയിന്‍പുരി മണ്ഡലത്തില്‍ നിന്ന് മത്സരിക്കുന്ന എസ്.പി നേതാവ് മുലായം സിങ് യാദവിന്റെ പ്രചാരണ റാലിയിലേക്കാണ് ബി.എസ്.പി നേതാവ് മായാവതിയെത്തിയത്. വേദിയില്‍ പരസ്പരം പ്രശംസാവാക്കുകള്‍ ചൊരിഞ്ഞ ഉത്തര്‍പ്രദേശിലെ മുതിര്‍ന്ന നേതാക്കള്‍ ഇതുവരെയുള്ള വൈരമെല്ലാം മറക്കുന്നതായും പ്രഖ്യാപിച്ചു. തനിക്കു വേണ്ടി പ്രചാരണത്തിനെത്തിയ മായാവതിയോട് നന്ദിയുണ്ടന്നും മായാവതിയെ ആദരിക്കുന്നുവെന്നും മുലായം തന്റെ പ്രസംഗത്തില്‍ പറഞ്ഞു.

മുലായം സിങ് യാദവ് നരേന്ദ്ര മോദിയെ പോലെ വ്യാജ ഒ.ബി.സിയല്ലെന്നും യഥാര്‍ഥത്തിലുള്ള പിന്നാക്ക നേതാവാണന്നും മായാവതി പറഞ്ഞു. ജനങ്ങള്‍ക്കു വേണ്ടി പഴയ കാലത്തെ ചില കാര്യങ്ങള്‍ മറക്കുകയാണന്നും ലക്‌നൗ ഗസ്റ്റ് ഹൗസ് സംഭവത്തെ ഓര്‍മ്മപ്പെടുത്തി മായാവതി കൂട്ടിച്ചേര്‍ത്തു. മുലായം സിങ് യാദവ് ഉത്തര്‍പ്രദേശിലെ എല്ലാ വിഭാഗം ജനങ്ങളുടെയും നന്മക്ക് വേണ്ടി പ്രവര്‍ത്തിച്ച വ്യക്തിയാണന്നും റെക്കോഡ് ഭൂരപക്ഷത്തോടെ അദ്ദേഹത്തെ വിജയിപ്പിക്കാന്‍ താന്‍ അഭ്യര്‍ഥിക്കുകയാണന്നും മായവതി പറഞ്ഞു. സമാജ്‌വാദി പാര്‍ട്ടി അധ്യക്ഷന്‍ അഖിലേഷ് യാദവും വേദിയില്‍ സന്നിഹിതനായിരുന്നു.

1995ല്‍ ബി.എസ്പി-എസ്.പി സഖ്യത്തിന്റെ തകര്‍ച്ചയിലേക്ക് നയിച്ച ലക്‌നൗ ഗസ്റ്റ് ഹൗസ് സംഭവം ഇരുപാര്‍ട്ടികള്‍ക്കുമിടയില്‍ പതിറ്റാണ്ടുകള്‍ നീണ്ടു നിന്ന ശത്രുതയ്ക്ക് വഴിവച്ചിരുന്നു. ലക്‌നൗ ഗസ്റ്റ് ഹൗസില്‍ യോഗം ചേരുന്നതിനിടെ എസ്.പി പ്രവര്‍ത്തകര്‍ ഇരച്ചു കയറി മായവതിക്കെതിരേ അക്രമം അഴിച്ചുവിട്ടതായിരുന്നു സംഭവം.
തലനാരിഴ വ്യത്യാസത്തിലാണ് അന്ന് എസ്.പി പ്രവര്‍ത്തകരുടെ അക്രമണത്തില്‍ നിന്ന് മായാവതി രക്ഷപ്പെട്ടത്. സാമാജ്‌വാദി പാര്‍ട്ടിയുടെ ഉരുക്കുകോട്ടയായ മയിന്‍പുരി മണ്ഡലത്തില്‍ നിന്നും മോദി തരംഗത്തിനിടയിലും കഴിഞ്ഞ തവണ 3.64 ലക്ഷം വോട്ടിന്റെ ഭൂരിപക്ഷത്തിനാണ് മുലായം സിങ് യാദവ് ജയിച്ചത്. അതോടൊപ്പം അസംഗഡില്‍ നിന്നുകൂടി ജയിച്ച മുലായം മയിന്‍പുരി സീറ്റ് രാജിവയ്ക്കുകയും അസംഗഡ് നിലനിര്‍ത്തുകയും ചെയ്തു. തുടര്‍ന്ന് നടന്ന ഉപതിരഞ്ഞടുപ്പിലും അവിടെ എസ്.പി സ്ഥാനാര്‍ഥി മൂന്ന് ലക്ഷത്തിലധികം വോട്ടിന്റെ ഭൂരിപക്ഷത്തിനാണ് ജയിച്ചത്. ഏപ്രില്‍ 23ന് മൂന്നാംഘട്ടത്തിലാണ് ഇവിടെ വോട്ടെടുപ്പ്.