കോഴിക്കോട്: പ്രധാനമന്ത്രി സ്ഥാനത്തേക്ക് രാഹുല്‍ ഗാന്ധിയെ നിര്‍ദേശിച്ചാല്‍ ഇടതു പിന്തുണ ഉണ്ടാകുമെന്ന് ലോക് താന്ത്രിക് ജനതാദള്‍ സംസ്ഥാന പ്രസിഡന്റ് എം.വി ശ്രേയാംസ് കുമാര്‍. കോഴിക്കോട് പ്രസ് ക്ലബിന്റെ 'ലോക്‌സഭ 2019' മീറ്റ് ദി ലീഡര്‍ പരിപാടിയില്‍ സംസാരിക്കുകയായിരുന്നു അദ്ദേഹം. ബി.ജെ.പി ഇതര സര്‍ക്കാര്‍ വരുമ്പോള്‍ അവിടെ ഇടതിന് പ്രാധാന്യമുണ്ട്. ഭരണത്തില്‍ എത്തുമ്പോള്‍ കോണ്‍ഗ്രസ് നിലപാട് എന്തായിരിക്കുമെന്നതാണ് നിര്‍ണായകം. ഇടതുപിന്തുണയില്ലാത്ത രണ്ടാം യു.പി.എയുടെ മിനിമം പരിപാടി അഴിമതിയായിരുന്നെന്ന് അദ്ദേഹം പറഞ്ഞു.

സോഷ്യലിസ്റ്റ് പാര്‍ട്ടിയുടെ വോട്ട് തനിക്ക് കിട്ടുമെന്ന് കെ. മുരളീധരന്‍ പറഞ്ഞത് രാഷ്ട്രീയ മാന്യതയ്ക്ക് ചേര്‍ന്നതല്ല. കൂടെനിന്ന് വോട്ട് മാറ്റി ചെയ്യുന്നത് കോണ്‍ഗ്രസുകാരാണ്. അത് താനും അനുഭവിച്ചതാണ്.

ലീഗിനെതിരേ ബി.ജെ.പി പാക് പതാക ആരോപണം ഉന്നയിച്ചിട്ടും രാഹുല്‍ പ്രതികരിക്കാത്തത് ഉത്തരേന്ത്യന്‍ വോട്ട് മുന്നില്‍ കണ്ടാണ്. അമിത് ഷായും രാഹുലും വോട്ട്ബാങ്ക് രാഷ്ട്രീയമാണ് കളിക്കുന്നത്.

പ്രധാനമന്ത്രിയുടെയും കേന്ദ്ര മന്ത്രിയുടെയും ഹെലികോപ്റ്ററില്‍ നിന്ന് കണ്ടെടുത്ത കറുത്തപെട്ടി എന്തെന്ന് വ്യക്തമാക്കണം. ഉദ്യോഗസ്ഥരെ സ്വാധീനിച്ച് വോട്ടര്‍ പട്ടികയില്‍ നിന്നും കേന്ദ്രം നീക്കം ചെയ്തത് നാല് കോടി ദലിതരുടെയും മൂന്ന് കോടി ന്യൂനപക്ഷങ്ങളുടെയും വോട്ടുകളാണെന്നും അദ്ദേഹം ആരോപിച്ചു.