കണ്ണൂര്‍: കണ്ണൂരിലെത്തിയ രാഹുല്‍ ഗാന്ധിയെ കാണാന്‍ സാധിക്കാത്തതിന്റെ നൈരാശ്യത്തില്‍ ശാഠ്യം പിടിച്ചു കരഞ്ഞ കുഞ്ഞ് നാഥാന്‍ ജോയ്‌സിനു സ്വപ്‌നസാഫല്യം. രാഹുലിന്റെ സഹോദരി പ്രിയങ്കാ ഗാന്ധിക്കൊപ്പം ചെലവിടാനായതിന്റെ സന്തോഷത്തിലാണ് ഈ കുരുന്ന്.
രാഹുലിനെ നേരിട്ടുകാണാന്‍ കണ്ണൂരിലെത്തിയെങ്കിലും സുരക്ഷാ പ്രശ്‌നങ്ങള്‍ കാരണം വേദിയില്‍ എത്താനാവാതിരുന്നത് നാഥാന്റെ പിതാവ് ഫെയ്‌സ്ബുക്കില്‍ പങ്കുവച്ചിരുന്നു. ഇത് അറിഞ്ഞതോടെ രാഹുല്‍ കുട്ടിയെ ഫോണില്‍ വിളിച്ചിരുന്നു. ഇന്നലെ പ്രിയങ്ക കണ്ണൂരിലെത്തുമ്പോള്‍ നേരിട്ടു കാണാനുള്ള സൗകര്യം ഒരുക്കാന്‍ ഡി.സി.സി പ്രസിഡന്റ് സതീശന്‍ പാച്ചേനിക്കു രാഹുലിന്റെ ഓഫിസ് നിര്‍ദേശം നല്‍കി.
തളിപ്പറമ്പ് തൃച്ചംബരം സെന്റ് പോള്‍സ് ഇംഗ്ലിഷ് മീഡിയം സ്‌കൂള്‍ രണ്ടാംക്ലാസ് വിദ്യാര്‍ഥിയായ നാഥാന്‍ ജോയ്‌സ് രാഹുല്‍ ഗാന്ധിയുടെ കടുത്ത ആരാധകനാണ്. രാഹുലിനെ നേരില്‍ കാണണമെന്ന ആഗ്രഹം വികാരമായി കൊണ്ടുനടന്ന നാഥാന് ഒടുവില്‍ അദ്ദേഹത്തിന്റെ സഹോദരിയെ നേരില്‍ കാണാന്‍ സാധിച്ചു.
പിതാവ് സന്തോഷ് കാവിലിനും മാതാവ് സ്മിതയ്ക്കും ജ്യേഷ്ഠന്‍ ജോനാഥനും ഒപ്പമാണ് നാഥാന്‍ ജോയ്‌സ് വിമാനത്താവളത്തില്‍ എത്തിയത്. ജോനാഥനെ വാരിപ്പുണര്‍ന്ന് ചുംബിച്ച പ്രിയങ്കാ ഗാന്ധി രാഹുലിന്റെ സമ്മാനമായ, അദ്ദേഹം കൈയൊപ്പ് ചാര്‍ത്തിയ ചിത്രവും മിഠായികളും നാഥാനു നല്‍കി.
രാഹുല്‍ ഇനി വയനാട്ടിലെത്തുമ്പോള്‍ നാഥാനെ നേരില്‍ കാണുമെന്നും മാതാപിതാക്കളെ പ്രിയങ്ക അറിയിച്ചു.