ന്യൂഡല്‍ഹി: മുംബൈ ഇന്ത്യന്‍സുമായുള്ള തോല്‍വിയുടെ ക്ഷീണം മാറ്റാന്‍ ഹര്‍ഭജന്‍ സിങ്ങിന്റെ മോളുമൊത്തുള്ള സെല്‍ഫിയുമായി ബാംഗ്ലൂര്‍ റോയല്‍ ചലഞ്ചേഴ്‌സ് നായകന്‍ വിരാട് കോഹ്ലി. വാങ്കഡെ സ്റ്റേഡിയത്തിലെ കളി കഴിഞ്ഞ ഉടനെയാണ് ഹിനായ ഹീറുമൊത്തുള്ള സെല്‍ഫിയെടുത്തിരിക്കുന്നത്. ഏതായാലും ഇന്‍സ്റ്റഗ്രമില്‍ പോസ്റ്റ് ചെയ്ത കുഞ്ഞു ഹിനായയുമൊത്തുള്ള സെല്‍ഫി ആയിരക്കണക്കിന് ആരാധകരുടെ മനം കവര്‍ന്നതായാണ് റിപ്പോര്‍ട്ട്.

ബേബി ഹിനായ തന്റെ താടിക്കുള്ളില്‍ എന്തോ തിരയുകയാണെന്നും ഒരാള്‍ ഇത്രയും ഭംഗിയും ഓമനത്തവും ചേര്‍ന്നതാവുന്നതെങ്ങിനെയെന്ന് താന്‍ അതിശയപ്പെടുന്നുവെന്നും ചിത്രത്തിന് അടിക്കുറിപ്പായി കോഹ്ലി ചേര്‍ത്തിരിക്കുന്നു. കുഞ്ഞു ഹിനായ ഹര്‍ഭജന്റെ ഭാഗ്യമാണെന്നും ദൈവം എല്ലാവരേയും അനുഗ്രഹിക്കട്ടേയെന്നും കോഹ്ലി കൂട്ടിച്ചേര്‍ക്കുന്നു.

നേരത്തെ സചിനോടൊപ്പം സെല്‍ഫിയെടുത്തും ഹിനായ ആരാധകരുടെ മനം കവര്‍ന്നിരുന്നു.