നീലേശ്വരം: പരീക്ഷയുടെ കടുപ്പം കൊണ്ടു മിക്കവരും അവസാന പരീക്ഷയില്‍ കാലിടറി വീഴുമെങ്കിലും നിശ്ചയദാര്‍ഢ്യം ബിജിതയെ കൈവിട്ടില്ല. ചാര്‍ട്ടേഡ് അക്കൗണ്ടന്റ് ഓഫ് ഇന്ത്യ പരീക്ഷയില്‍ മികച്ച വിജയം നേടിയാണ് തൈക്കടപ്പുറം അനന്തംപള്ള വാഴവളപ്പില്‍ ഹൗസിലെ വി.വി ബിജിത (25) ശ്രദ്ധേയയായത്.  വി.തങ്കപ്പന്റെയും വി.വി ശോഭനയുടെയും മകളായ ഈ മിടുക്കി പടന്നക്കാട് നെഹ്‌റു കോളജില്‍ നിന്നും ഉയര്‍ന്ന മാര്‍ക്കോടെ ബി.കോം പാസാകുകയും തുടര്‍ന്ന് ആര്‍ട്ടിക്കിള്‍ഷിപ്പും പൂര്‍ത്തിയാക്കി. സി.എ പ്രവേശന പരീക്ഷ, പ്രഫണല്‍ കോംപീറ്റന്‍സി എന്നറിയപ്പെടുന്ന ഇന്റര്‍ മീഡിയേറ്റ് എന്നിവ ആദ്യ ശ്രമത്തില്‍ തന്നെ പാസായി. സി.എ ഫൈനല്‍ പരീക്ഷയുടെ ആദ്യഭാഗവും കടന്നെങ്കിലും രണ്ടുതവണ എഴുതിയാണ് രണ്ടാം ഭാഗം നേടിയത്.