പുതുക്കാട്: കല്ലൂര്‍ ആദൂര്‍ കോളനിയില്‍ വീട് തകര്‍ന്നു വീണു. പാലത്തുപറമ്പില്‍ തങ്കയുടെ ഓടിട്ട വീടാണ് തകര്‍ന്ന് വീണത്. മേല്‍ക്കൂര പൂര്‍ണമായും തകര്‍ന്നുവീണു. വീടിന്റെ പിറകിലെ ഭിത്തിയും ഇടിഞ്ഞുവീണു.
ശബ്ദം കേട്ട് തങ്ക പുറത്തേക്ക് ഓടിയതുമൂലം അപകടത്തില്‍നിന്ന് രക്ഷപ്പെട്ടു. നിമിഷങ്ങള്‍ക്കകം വീടിന്റെ മേല്‍ക്കൂര നിലംപൊത്തുകയായിരുന്നു. അഞ്ചു വര്‍ഷം മുന്‍പ് നാട്ടുകാരുടെ ശ്രമഫലമായാണ് വീടിന്റെ മേല്‍ക്കൂര പുതുക്കി പണിതത്. പിന്നീട് അറ്റകുറ്റപണികള്‍ നടത്താന്‍ പണമില്ലാതെ വന്നതോടെ മേല്‍ക്കൂര ചിതലരിച്ച നിലയിലായിരുന്നു. തൃക്കൂര്‍ പഞ്ചായത്തംഗം സൈമണ്‍ നമ്പാടന്‍, ബ്ലോക്ക് പഞ്ചായത്തംഗങ്ങളായ അല്‍ഫോണ്‍സ സ്റ്റീമ, പ്രിബനന്‍ ചുണ്ടേലപറമ്പില്‍ എന്നിവര്‍ സ്ഥലത്തെത്തിയിരുന്നു.