തിരുവനന്തപുരം: സത്യമല്ലാത്ത വാര്‍ത്തകള്‍ കണ്ടെത്തുന്നതിനായി സര്‍ക്കാര്‍ നിയോഗിച്ചിരിക്കുന്ന സംഘത്തിന് വര്‍ഷത്തില്‍ വേണ്ടിവരുന്നത് 13 ലക്ഷത്തിലേറെ രൂപ.
വ്യാജ വാര്‍ത്ത കണ്ടെത്താന്‍ നിയോഗിച്ചിരിക്കുന്ന സംഘം വ്യാജ വാര്‍ത്തയെന്ന പേരില്‍ കഴിഞ്ഞ ദിവസം കണ്ടെത്തി പി.ആര്‍.ഡിയുടെ ഫെയ്‌സ്ബുക്ക് പേജില്‍ പോസ്റ്റ് ചെയ്തതിനു പിന്നാലെ ആ വാര്‍ത്തയ്ക്ക് ഉറവിടമായ ഉത്തരവ് പുറത്തുവന്നിരുന്നു.
ഇതോടെ വ്യാജവാര്‍ത്ത കണ്ടെത്താന്‍ നിയോഗിച്ചവര്‍തന്നെ പ്രതിസ്ഥാനത്താകുകയും ചെയ്തു. വ്യാജവാര്‍ത്ത കണ്ടെത്തുന്നതിനുള്ള ഫാക്ട് ചെക്ക് ഡിവിഷനിലേക്ക് സിഡിറ്റില്‍നിന്നാണ് മൂന്നുപേരെ നിയമിച്ചിട്ടുള്ളത്. ഒരു ഡിസൈനറെയും രണ്ട് സോഷ്യല്‍ മീഡിയ എഡിറ്റര്‍മാരെയുമാണ് ഈ സംഘത്തിലേക്ക് നിയോഗിച്ചത്.
ഈ മൂന്നു തസ്തികയിലേക്കുകൂടി നിയമിക്കപ്പെട്ടവരുടെ ഒരു വര്‍ഷത്തെ ശമ്പളത്തിനായി 13,34,280 രൂപയാണ് അനുവദിച്ചത്. സോഷ്യല്‍ മീഡിയകളില്‍ വന്ന നിരവധി വാര്‍ത്തകള്‍ ഈ സംഘം വ്യാജവാര്‍ത്തെയന്നുകാണിച്ച് പി.ആര്‍.ഡി ഫെയ്‌സ്ബുക്ക് പേജില്‍ കൊടുത്തിരുന്നു.
കഴിഞ്ഞ ദിവസം ഒരു പത്രത്തില്‍ വന്ന വാര്‍ത്തയുടെ നിജസ്ഥിതി പരിശോധിക്കാതെ അതും വ്യാജവാര്‍ത്തയെന്നുപറഞ്ഞ് ഫെയ്‌സ്ബുക്കില്‍ പോസ്റ്റ് ചെയ്തത് വിവാദമായി. ആ വാര്‍ത്തക്ക് ആധാരമായ ഉത്തരവുകൂടി പുറത്തുവന്നതോടെ ഫാക്ട് ചെക്ക് ഡിവിഷന്റെ വിശ്വാസ്യതതന്നെ ചോദ്യം ചെയ്യപ്പെടുന്നതായി.
സി.പി.എമ്മുകാരെ ഇരുത്തി സര്‍ക്കാരിനെതിരായ വാര്‍ത്തകള്‍ വ്യാജ വാര്‍ത്തകളാണെന്ന് വരുത്തിതീര്‍ക്കുകയാണെന്ന ആക്ഷേപമാണ് ഇപ്പോള്‍ ഉയരുന്നത്.