ജിദ്ദ: കൊവിഡ് മൂലം നാട്ടില്‍ പോയി വിമാന സര്‍വീസ് ഇല്ലാത്തത് കാരണം റീ എന്‍ട്രി കാലാവധി അവസാനിക്കുന്നവരുടെ റീ എന്‍ട്രി നീട്ടി നല്‍കും. ഇതിനുള്ള ഒരുക്കങ്ങള്‍ നടക്കുന്നുണ്ട്. ഇതോടെ വിമാന സര്‍വീസ് തുടങ്ങുന്ന മുറക്ക് ആളുകള്‍ക്ക് സഊദിയിലേക്ക് തിരിച്ചെത്താം.
വിദേശ രാജ്യങ്ങളില്‍ കുടുങ്ങിയ ഭൂരിഭാഗം സഊദി പ്രവാസികളുടെയും റീ എന്‍ട്രി
കഴിഞ്ഞ ദിവസം അവസാനിക്കുകയാണെന്നും ഇനി എന്തു ചെയ്യണമെന്നുമുള്ള ചോദ്യത്തിന് മറുപടിയായാണ് ജവാസാത്ത് ഇക്കാര്യം അറിയിച്ചത്.
അബ്ശിര്‍ ബിസിനസില്‍ റീ എന്‍ട്രി നീട്ടി നല്‍കുന്നതിനുള്ള സംവിധാനം ഇല്ലെന്ന പരാതിയും പലരും ഉന്നയിച്ചിരുന്നു. റീ എന്‍ട്രി കാലാവധി രണ്ടാഴ്ച മുമ്പ് അവസാനിച്ചവര്‍ക്കും ഈ ആനുകൂല്യം ലഭിക്കുമെന്ന് ജവാസാത്തിന്റെ അറിയിപ്പിലുണ്ട്.
വിദേശത്തുള്ളവരുടെ റീ എന്‍ട്രിയും ഇഖാമയും മൂന്നു മാസത്തേക്ക് നീട്ടിനല്‍കിയിട്ടുണ്ടെന്നും ഇനി നീട്ടിനല്‍കുമോ എന്ന കാര്യം പിന്നീട് അറിയിക്കുമെന്നുമായിരുന്നു നേരത്തെ ഇത്തരം ചോദ്യങ്ങള്‍ക്ക് ജവാസാത്ത് മറുപടി നല്‍കിയിരുന്നത്.
ഇത് സംബന്ധിച്ച് പലരും നിരന്തരമായി ചോദ്യങ്ങള്‍ ഉന്നയിച്ചുകൊണ്ടിരിക്കുകയാണ്. വരും ദിവസങ്ങളില്‍ പുതുക്കല്‍ നടപടികളുണ്ടാവുമെന്നാണ് പ്രതീക്ഷ.
അതേ സമയം
നാട്ടിലേക്ക് പോകാനുള്ള എക്സിറ്റ് വിസാ കാലാവധി അവസാനിക്കുന്നവരുടേയും കാലാവധികള്‍ നീട്ടി നല്‍കുമെന്ന് സഊദി ജവാസാത്ത് അറിയിച്ചു. ഇതിനുള്ള നടപടികളും പുരോഗമിക്കുന്നുണ്ട്. ഒരു ചോദ്യത്തിന് മറുപടിയായാണ് ജവാസാത്ത് ട്വിറ്ററില്‍ പ്രതികരിച്ചത്.