മലപ്പുറം: കാലിക്കറ്റ് സര്‍വകലാശാല സി-സോണ്‍ കലോത്സവത്തില്‍ പി.എസ്.എം.ഒ കോളജ് മുന്നില്‍. ഏതാനും മത്സരഫലങ്ങള്‍ക്കൂടി പുറത്തുവരാന്‍ ബാക്കിനില്‍ക്കേ 185 പോയിന്റുകള്‍ നേടിയാണ് പി.എസ്.എം.ഒ കോളജ് തിരൂരങ്ങാടി കിരീടത്തോടടുത്തിരിക്കുന്നത്. തൊണ്ണൂറിലേറെ മത്സരങ്ങളുടെ ഫലമാണ് ഇതുവരെ പുറത്തുവന്നത്. ഓഫ്‌സ്റ്റേജ് മത്സരങ്ങളില്‍ വ്യക്തമായ മേല്‍ക്കോയ്മയുണ്ടായിരുന്ന നിലവിലെ ചാംപ്യന്മാരായ പി.എസ്.എം.ഒ കോളജിനെതിരേ മമ്പാട് എം.ഇ.എസ് കോളജ് മികച്ച മുന്നേറ്റം നടത്തിയിരുന്നു. ഇഞ്ചോടിച്ചു മത്സരത്തില്‍ 180 പോയിന്റുമായി മമ്പാട് എം.ഇ.എസ് കോളജ് തൊട്ടുപിറകില്‍ രണ്ടാം സ്ഥാനത്തുണ്ട്.
 88 പോയിന്റ് നേടിയ കാലിക്കറ്റ് യൂനിവേഴ്‌സിറ്റി കാംപസാണ് മൂന്നാം സ്ഥാനത്ത്. ഏപ്രില്‍ 28നാണ് സി-സോണ്‍ കലോത്സവത്തിനു തിരിതെളിഞ്ഞത്. 28, 29, 30 തിയതികളിലായി മലപ്പുറം വനിതാ കോളജിലാണ് സ്‌റ്റേജിതര മത്സരങ്ങള്‍ നടന്നത്. മലപ്പുറം ഗവ. കോളജില്‍ നാലു വേദികളിലായി മെയ് ഒന്നിനാണ് സ്‌റ്റേജ് മത്സരം നടന്നത്. സര്‍വകലാശാലയില്‍ അഫിലിയേറ്റ് ചെയ്ത 120 കോളജുകളില്‍നിന്നുള്ള അയ്യായിരത്തോളം പ്രതിഭകള്‍ ആറു ദിവസങ്ങളിലായി നടന്ന കലോത്സവത്തില്‍ മാറ്റുരച്ചു.