വടകര: ആശ ആശുപത്രിയിലെ ഡോക്ടറെ കൈയേറ്റം ചെയ്ത സംഭവത്തില്‍ പ്രതികളെ അറസ്റ്റ് ചെയ്യാത്തതില്‍ പ്രതിഷേധിച്ച് ഐ.എം.എ ഡിസ്ട്രിക്ട് ടാസ്‌ക്‌ഫോഴ്‌സ് പ്രഖ്യാപിച്ച പണിമുടക്ക് വടകരയില്‍ പൂര്‍ണം.
സര്‍ക്കാര്‍, സ്വാകര്യ ആശുപത്രികളിലൊന്നും ഒ.പികള്‍ പ്രവര്‍ത്തിച്ചില്ല. സ്വകാര്യ പ്രാക്ടീസുകളും ചെറിയ ക്ലിനിക്കുകളും തുറന്നു പ്രവര്‍ത്തിച്ചില്ല. രാവിലെ വടകര ആശ ആശുപത്രിക്കു മുന്നില്‍ ഡോക്ടര്‍മാര്‍ പ്രതിഷേധയോഗം ചേര്‍ന്നു. ഐ.എം.എ സെക്രട്ടറി ഡോ. സജിത്ത് പ്രസാദ്, പ്രസിഡന്റ് ഡോ. പി. നസീര്‍, ഡോ. കെ.എം അബ്ദുല്ല, ഡോ. മുരളീധരന്‍, ഡോ. കെ. അജ്മല്‍, ഡോ. വി.കെ ജമാല്‍ സംസാരിച്ചു. രാഷ്ട്രീയ സമ്മര്‍ദങ്ങള്‍ക്ക് വഴങ്ങി പൊലിസ് ഇനിയും നിഷ്‌ക്രിയത്വം കാണിച്ചാല്‍ ശക്തമായ സമരമാര്‍ഗം സ്വീകരിക്കുമെന്ന് നേതാക്കള്‍ വ്യക്തമാക്കി.